باسم يوسف: صلاح بالإنجليزي المكسر بتاعه وصل رسالته للعالم.. “عيب عليكم”

دافع الإعلامي الساخر باسم يوسف، عن اللاعب محمد صلاح، وقال إن محمد صلاح نجح في توصيل رسالته للعالم أجمع، “ورب فيديو بسيط من غير عياط، يوصل برة ويغير صوت واحد ده ابرك بكتير”.

وقال باسم يوسف في منشور له عبر صفحته الرسمية على موقع التواصل الاجتماعي “فيس بوك”: “صلاح بالانجليزي المكسر والاداء “الفلات” او المخطوف زي ما ناس وصفته، الاداء “الوحش” ده عمل ملايين التفاعلات والمشاهدات.. كونه بقى ان :الكلام مايع، مافيش ادانة واضحة، مسك العصاية من النص، قصف الجبهات مش دور صلاح خالص.. واصلا هو فيديو غير موجه لينا.. ورب فيديو بسيط من غير عياط ومن غير نرفزة ومن غير شتيمة ومن غير ادانات وشجب وعياط ودموع لكن يوصل برة ويغير صوت واحد ده ابرك بكتير”.

وأضاف في منشوره: “واحد زي صلاح، ملهم لأجيال كتيرة قصة كفاح غير مسبوقة ، راجل بيتبرع في السر اكتر من العلن، فاتح بيوت انا وانتم مش عارفين عددها، واحد زي ده نخسره ليه؟ عشان ما شفاش غليلك في قضية بقالها ييجي ميت سنة اعتى الانظمة واكبر الدول فشلوا فيها؟ أتأخر؟ ياسيدي المهم انه وصل.. مش قوي بما فيه الكفاية؟ اه بالنسبة لك ، لكن بالنسبة لناس كتيرة قوي قوي قوي دي ممكن يكون اول مرة يسمعوا فيها عن القضية.. الدنيا برة غير خالص الوطن العربي عندنا بس ده له بوست لوحده”.

باسم يوسف: صلاح لما نزل صورته في القدس وكتب تضامن؟.. اتشتم برضة

وأوضح :”فاكرين لما صلاح نزل صورته في القدس وكتب تضامن؟ اتشتم برضة.. طيب لما يبقى عندنا واحد بوزن صلاح وكل شوية نشتمه عشان ماعملش اللي احنا عشمانين فيه، طيب على الاقل لو ما شجعناش صلاح مش لازم ندوس عليه.. صلاح مش المفروض يكون هو هدف لغضبك”.

وأكد “انا مريت بالفترة دي: ساكت ليه، ما تعمل زي فلان ما تقول زي علان؟ كل واحد و ظروفه و حساباته.. لا يكلف الله نفسا الا وسعها.. كل واحد ادرى بالضغوط اللي عليه.. بلاش نكون احنا كمان سبب زيادة في الضغط عليه”.

واختتم منشوره قائلا: “في الاخر كل واحد ورأيه.. كل واحد يحب ويكره اللي هو عايزه. لو حبيت صلاح او كرهته انت حر، البوست ده مش حيغير حاجة.. ودي صورتي مع فخر العرب، محمد صلاح“.

إقرأ أيضا

باسم يوسف: محمد صلاح اختار وقت الفيديو صح.. ولو طلع قبل كدة كان “اتدبح”