تصدرت الفنانة عبير صلاح الدين، مواقع البحث خلال الساعات القليلة الماضية وذلك بعد تصريحاتها أمس في برنامج “كلام الناس” مع الإعلامية ياسمين عز، المذاع عبر فضائية “إم بي سي مصر”.
وتحدث الفنانة عبير صلاح الدين، عن خلافها مع الفنان محمد صبحي، بسبب عدم تعاونها معه في الأجزاء الأخيرة من مسلسله الشهير يوميات ونيس، قائلة: “لو قولت الحقيقة هزعل ناس كتير جدا وهتهاجم جامد واللجان الإلكترونية هتروقني ومحدش هيصدقني، وهيقولوا هو اللي عملها بس ربنا شاهد وربنا عارف والناس اللي قريبين مني قالوا لي أنتي الحل بتاعك حاجة واحدة، هي أنك تستسمحي الأستاذ علشان تعرفي تشتغلي، قولت لهم لا مش هعمل كده والرزق على الله أنا ما غلطتش في حاجة أنا كنت بقول رأيي”.
وأضافت الفنانة عبير: “الجزء السابع مكنش ينفع إننا نكمله، كان مط وتطويل وحصل فيه خلافات كتير وتوقف التصوير مدة 6 شهور صورنا فيه شغل وناس اتخانقوا مع بعض فمشيو فاضطرينا نعيد التصوير تاني ببلاش وأنا قولت لا مش عايزه أكمل المسلسل ده من حقي كممثلة أني مش لاقيه نفسي في الدور، لأني مش هحرق الشخصية بعد نجاحها”.
وتابعت: “دي كانت وجهة الاختلاف، وقالوا لي أنتي كده مش هتشتغلي خالص، وهتقعدي زي ما ناس كتير قعدت، فقولت الرزق على الله أنا ما غلطتش في حاجة أنا كنت بقول رأيي”، متابعة: “حاولت لحد ما جالي اكتئاب خمس سنين من 2010 حتى 2015 قاعده في البيت وكل حاجه بتتقفل في وشي”.
كما تحدثت عن مشاركتها في مسلسل “سر الأرض”، قائلة: “الفيلم كان من انتاج وزارة الزراعة، وكان العمل في حب مصر، والحلقة كانت ربع ساعة، وكل الفنانين والممثلين كانوا متبرعين بأجورهم ولو كنا بنصور حلقة عن البطاطا كنا بناخد شوال بطاطا أو بطاطس أو طماطم، وكان هذا تقديرا من وزارة الزراعة”.
يذكر أن الفنانة عبير صلاح الدين قد غابت عن الساحة، لمدة 12 عاما وذلك بعد النجاح التي حققته في سلسلة مسلسل «يوميات ونيس» مع الفنان محمد صبحي، والتي عرفها الجمهور وعلقت في أذهانهم من خلال أنجح أدوارها على الإطلاق «عبلة» وشهد موسمه السابع عام 2010 آخر ظهور لها على الشاشة الصغيرة.