عصام صاصا: بقالي أكتر من شهر قاعد من غير شغل ومستنى قضاء ربنا

عصام صاصا مطرب المهرجانات، يبدو أنه يمر بحالة نفسية سيئة بعد دهسه أحد المواطنين فى بداية شهر مايو الجارى، أعلى الطريق الدائرى بالمنيب، ليفقد الرجل حياته بعد نقله للمستشفى.

عصام صاصا كتب بوست مطول اليوم الخميس على صفحته عبر فيس بوك، تحدث فيها عما يعانيه من ألم نفسي منذ وقوع الحادث، وكتب يقول " ربنا وحده يعلم انا بكتب الكلام دا وانا عامل ازاى و فيا ايه ..

انا بقالي اكتر من شهر قاعد من غير شغل ومعنديش اي حاجه اعملها غير اني قاعد وما باليد حيله و مستني قضاء ربنا سبحانه وتعالي و محدش هيفهم او هيحس بالموضوع غيرى ..

معاناة عصام صاصا بعد حادث دهس مواطن والتسبب فى موته

و انا مطلعتش اتكلمت وعدت وزدت في الموضوع كتير ومحدش شافني حته بفيديو قولت اي كلمة خالص 
لكن انا عندي شغلي و عندي عقود والتزامات لما اعملها واخلصها يا اما هدخل في قصه تانيه انا مش قدها و شرط جزائي .. 
انا هنزل شغلي و هشتغل لاني مش ب ايدي اي حاجه غير اني اعمل كده

انا عندي امي و عندي اخويا و عندي مراتي وابني وفرقه فيها اكتر من ٣٥ شخص في رقبتي انا شاب لسه ببداء حياتي ولسه بقول يارب .. مصاريف البيت و الاقساط و الحاجات دي كلها اللي انتو متعرفوش عنها حاجه مين اللي هيدفعها انا طالع اتكلم لان ما باليد حيله غير انكم لازم تفهموا ان كل اللي بتسمعوا مش صح الفلوس و القصور والعربيات كل ده مش صح و حال الناس اللي شاغلين معايا كل دول حالهم واقف بسببي انا كل دول ليهم بيوت وعيال ودنيا تانيه خالص

انا عارف ومتاكد ان ربنا مش هيورينا الشر و مش هيوريني اي حاجه وحشه ده ابتلاء من عند ربنا سبحانه وتعالي و انا راضي ب كل حاجه و مش هقول غير الحمدلله علي كل شئ والحمدلله و اللي ربنا كاتبهولي هشوفوا .. سوا خير او شر محتاج من كل الناس اللي بتحبني تدعيلي من قلبها بجد انا عمري ما كنت شخص مؤذي و عمري ما كنت شخص وحش مع حد .. ربنا كبير ..

وحشتوني اوي يا احلي جمهور في الدنيا 
عصام صاصا

موقع الأيام المصرية، يقدم لكم تغطية شامل ومتنوعة لكافة الأخبار والأحداث المحلية والعالمية، فى شتى المجالات، السياسية، الاقتصادية، الاجتماعية، الرياضية، الفنية، ونرصد لكم الخدمات الهامة سعر الذهب، سعر الفضة، سعر اليورو، سعر الدولار، سعر الدينار الكويتي، سعر الريال السعودي.