عودة بطلة حمادة وتوتو، لبلبة اتعلمت النصب في فيلم عصابة الماكس

كشفت الفنانة لبلبة في بث مباشر مع الإعلامية بوسي شلبي، عبر حسابها الرسمي على موقع تبادل الصور والفيديوهات “إنستجرام” عن تفاصيل ملامح شخصيتها في فيلم عصابة الماكس.

لبلبة تكشف طقوسها في شخصية عصابة الماكس

تحدثت الفنانة لبلبة عن شخصيتها في فيلم عصابة الماكس، في فيديو بث مباشر منذ قليل مع الإعلامية بوسي شلبي، عبر حسابها على إنستجرام، قائلة أنها تقدم شخصية النصابة في عصابة الماكس، لكنها بدأت رحلة النصب في أعمال قديمة.

قائلة: عملت شخصية النصابة على خفيف في حمادة وتوتو، بعدها اتعلمت النصب الاحتراف في الشيطانة التي أحبتني، حتى إنهم جابولي واحد حرامي عشان يعلمني، واتعلمت النشل وعرفت إن كل السرقة بتحصل من جوه الجاكت أو بره بتم بصبعين السبابة والوسطى، وبالفعل اتعلمت السرقة"

وتابعت: عصابة ماكس بقى ده أحدث أنواع السرقة، فالعصابة دي شوية مختلفة لأنها اتكونت، كونها أحمد فهمي، حب يجيب ناس يحسس بيهم الجمهور إنهم أسرة بتحب بعض رغم إنهم بيسرقوا، وفيه مشاهد عملتها بمنتهى الجدية ومكنتش متخيلة إنها هتضحك بس اكتشفت الناس بتضحك".

وعن مشهدها بالسيجارة لأول مرة، قالت: كان صعب عليا أعمل مشهد إني اتكلم وأن حاطة السيجارة في بوقي، خصوصا إني عمري ما شربت سجاير، الأول كانت السيجارة بتقع مني في البروفات، أو الكلام بيطلع مش واضح، لكن بعدها بقيت شاطرة جدا فيها، لحد ما عرفت اتكلم والسيجارة في بوقي وبقيت زي الجنية فيها"

وعن المشاهد التي لم تتخيل أنها تضحك الجمهور، قالت: المشهد الذي طلبت فيه من روبي تلبس المايوه زي ما جوزها طلب منها، وقتها بقيت أقولها أغزي الشيطان وألبسي المايوه، مكنتش متخيلة إنهم هيضحكوا على المشهد لأني كنت بقوله بجدية، لكن حصل العكس كل ما أقوله الناس تضحك ورا الكاميرا".

أعمال لبلبة مع عادل إمام والمخرج محمد عبد العزيز

واختتمت أن كل أعمالها التي وضعتها على طريق الكوميديا كانت مع الفنان عادل إمام والمخرج محمد عبد العزيز، قائلة: في حياتي كلها وأعمالي كلها مع الفنان عادل إمام عمري ما عملت فيلم كوميدي وقولت لنفسي أنا دلوقتي بعمل فيلم كوميدي، أنا بعمل الفيلم بمنتهى الجدية وبنسى إنه كوميدي بيطلع كوميدي والناس بتضحك، لكن كل ما تركزي إنك تقولي جملة عشان الناس تضحك عمرهم ما هيضحكوا، موضحة أن عادل إمام والمخرج محمد عبد العزيز الاتنين حطوها على خط الكوميديا، مع أستاذي المخرج محمد عبد العزيز في فيلم البعض يذهب للمأذون مرتين، كانت بدايتي أنا وعادل في الخروج مع بعض على الشاشة، التركيبة الناس حسوها".

وتابعت: الأستاذ فاروق صبري والاستاذ محمد عبد العزيز، قال الاتنين دول اتخلقوا لبعض، لما جم يعملوا فيلم “خلي بالك من جيرانك”مكنتش أنا اللي هاعمل الدور وفكروا وقالوا البت نونه هي اللي هتليق على الدور، كوميديا أستاذ عادل بقيت ألقطها واتعلمتها معاه".

موقع الأيام المصرية، يقدم لكم تغطية شامل ومتنوعة لكافة الأخبار والأحداث المحلية والعالمية، فى شتى المجالات، السياسية، الاقتصادية، الاجتماعية، الرياضية، الفنية، ونرصد لكم الخدمات الهامة سعر الذهب، سعر الفضة، سعر اليورو، سعر الدولار، سعر الدينار الكويتي، سعر الريال السعودي.