إبراهيم فايق يثير الجدل حول شخصية الرجل الثاني المتسبب في وفاة رفعت

إبراهيم فايق لسة مكمل ومصمم يجيب حق الراحل احمد رفعت، وقرر انه يسأل سؤال تاني ويسيب الأطراف كلها تتكلم، وكان سؤاله: مين الاسم التاني اللي احمد رفعت كان يقصده واللي كان السبب في تعرضه لضغط نفسي؟

اول رد كان من محمد رشوان اللي بيقول انه محامي احمد رفعت، وقال لابراهيم فايق ان احمد لما كان بيشتكيلك وقال اسمين كان قصده على العشم، مش بيتهم حد ولا حاجة، وذكر اسم جديد في القضية وقال ان الاسم التاني يبقا عبد الظاهر السقا باعتبار انه كان مدير الكرة وكان مع احمد رفعت في الرحلة، ولو كان قلبه على اللاعب وعايز يقوله لا كان قاله، وان دوره يشوف الورق ولو فيه خطأ كان قاله لاء يا احمد متعملش كدة
اما عبد الظاهر السقا فكان لازم يرد، خصوصًا بعد ظهور اسمه في الموضوع 
فقال انا كمدير كرة مليش ان ادخل في الأوراق والحاجات دي كلها، ومش انا اللي ببيع اللاعيبة او اشتريها، دي مش شغلتي، انا مجرد منفذ لأوامر الإدارة وكان دوري ان اديله الباسبور وخلاص، وكلنا سلمنا عليه قبل ما يمشي
وكمان وضح انه مستحيل يكون الاسم التاني، لأن احمد رفعت قال ان الأسم التاني مسئول في الدولة، وهو مسئول في النادي مش في الدولة
وهنا كان لازم نادر شوقي يتدخل 
واللي اخد صف عبد الظاهر السقا وقال لا طبعًا مش هو الأسم التاني، وان الكلام ده كله غلط، لأن عبد الظاهر السقا مش مسئول، هو كمدير كرة مكنش يعرف حاجات كتير من اللي بتحصل في النادي، وكمان استشهد بوجوده في العزا، وقال ان كابتن السقا لو في شك 1% فيه مكنش حضر العزا
وهنا ممكن نقف لحظة ونفكر، مين كان المفروض يحضر العزا ومحضرش؟ ولو محضرش ممكن يكون هو المتسبب من وجهة نظر نادر شوقي؟
المهم ان نادر شوقي برأ عبد الظاهر السقا، وقال انه كانت علاقته باحمد رفعت كويسة جدًا، وان مسئوليات السقا مكنتش تديله فرصة انه يأذي رفعت اصلًا، وان فيه حاجات كتير عبد الظاهر السقا مكنش يعرف عنها حاجة
فتفتكر مين الأسم التاني اللي إبراهيم فايق بيدور عليه؟ وهل هو من الشخصيات اللي محضرتش العزا؟

موقع الأيام المصرية، يقدم لكم تغطية شامل ومتنوعة لكافة الأخبار والأحداث المحلية والعالمية، فى شتى المجالات، السياسية، الاقتصادية، الاجتماعية، الرياضية، الفنية، ونرصد لكم الخدمات الهامة سعر الذهب، سعر الفضة، سعر اليورو، سعر الدولار، سعر الدينار الكويتي، سعر الريال السعودي