"الطفلة كبرت".. ماذا قالت إنجي علاء عن آخر لقاء مع حسام شوقي؟
روت المؤلفة إنجي علاء تفاصيل آخر لقاء جمعها بالمنتج الفني الراحل حسام شوقي، المشرف العام على الإنتاج بـ شركة سينرجي.
كتبت إنجي علاء على "فيسبوك" إنها تحاول الهروب من التفكير في الحادثة التي تعرض لها منتجي شركة "سينرجي": "بحاول مفكرش من ساعة إللي حصل، وأهرب بأي طريقة من الواقع المرعب ده، لسة مش قادرة استوعب، أخر مرة قابلت حسام لقيت فتحي قبلها ربنا يرحمه ويحسن إليه بيكلمني بيقولي على الميعاد".
وتابعت إنجي علاء عن اللقاء الأخير الذي جمعها بـ حسام شوقي، رغم انشغاله، لكنه كان هادئ، ويحاول أن يخفف من وطأة الأخبار السيئة التي تتعلق بشغل إنجي علاء: "أستغربت لأني عارفة إن حسام وقتها كان مشغول ومسافر وكنا هنتقابل لما يرجع، المهم حسام قالي أنا جيتلك في النص المكتب مخصوص بسرعة ولازم أسافر على طول، وكانت مقابلة كلها أخبار مش كويسة وكانت حالتي النفسية ملخبطة والشغل وقصصه، وحسام كان مبتسم وهادي زيادة، زي ما يكون في دنيا تانية، كان في حاجة غريبة فيه وفي كلامه مافهمتهاش وقتها، فهمتها دلوقتي، فهمت كنت عايز تقول إيه يا حسام".
تفاصيل وصية حسام شوقي لـ إنجي علاء
أضافت إنجي علاء أنها شعرت الآن أن حسام شوقي كان يودعها، ويخبرها كيف تستكمل الطريق بمفردها: "أنا كنت عاملة زي الطفلة اللي كبرت في مكان وهي مش حاسة، سنين شغل وشقى وفرح وعمره ما زعل مني لما كنت أتضايق وأتعصب عشان عارف قد إيه بحب الشغل وبخاف عليه، اليوم ده كان عايز يقولي إن الطفلة كبرت خلاص وأنها لازم هتكمل لوحدها، كان بيحاول يعرفني أكمل إزاي، طلع كان بيودعني وأنا مش فاهمة".
واختتمت إنجي علاء حديثها بأنها لن تنس نصائح حسام شوقي: "والله ما هنسى إللي قلتهولي والله ما هنسى كلامك ونصايحك يا أخويا وأستاذي وكل حاجة نضيفة وحلوة وأحلى أيام، مش هنسى أكيد بس يارب أقدر أكمل في الدنيا الصعبة دي، ربنا يرحمك يا حسام أنت وفتحي وتامر ومحمود ويسكنكم فسيح جناته ويهونها علينا".
ويحرص "الأيام المصرية"على موافاتكم بالتفاصيل الكاملة حول آخر الأخبار عن تبعات المنتجين الأربعة الراحلين.
