بعد القبض عليه.. زوجة عصام صاصا: «هو اللي سلم نفسه»
نشرت زوجة الفنان عصام صاصا، تدوينة تدافع فيها عن زوجها، عبر حسابها الرسمي على موقع تبادل الصور والفيديوهات “إنستجرام”.
زوجة عصام صاصا تدافع عنه
شاركت جهاد ماهر زوجة عصام صاصا، تدوينة عبر خاصية ستوري على حسابها بموقع إنستجرام، تدافع فيها عن زوجها عصام صاصا.
ورصدت الأيام المصرية، منشور «جهاد» التي قالت: «على فكرة محدش قبض على عصام زي الأخبار ما بتنزل، عصام هو اللي نزل علشان القضية بكره، وكان عامل الفيديو قبل ما ينزل علشان مش عارف هو هيحصل معاه إيه في الجلسة».
وكانت نشرت قبل هذه التدوينة، تدوينة أخرى، قالت فيها: "أكتر حاجة تعباني إني حولت في الأول أدافع عن عصام أنه مظلوم بس التريند خلاكو متشفوش الحقيقة، ودلوقتي بتقولوا حرام دا مظلوم لي بيحصل فيه كده".
تفاصيل أزمة عصام صاصا
خرج عصام صاصا في الساعات الماضية في مقطع فيديو، شاركه عبر حسابه الرسمي على موقع إنستجرام، يتحدث فيه عن أزمته الأخيرة، قائلاً: "يا جماعة أنا عايز اتكلم معاكم في حاجات مهمة، أنا دلوقتي نازل بلدي، وممكن يكون الفيديو ده ليا آخر فيديو هتشوفوه، وممكن تكون هتجرالي حاجة بعد الفيديو ده، فأنا نازل بلدي وممكن اتاخد في المطار، فعايز افهم الناس اللي حصل معايا بالظبط وايه اللي انا فيه".
وتابع صاصا: "حابب اتكلم مع الناس علشان فيه ناس كتير مش فاهمة حاجة وبتدخل تعلق وهي مش فاهمة، أنا كنت راجع من شغلي ورايح اجيب ابني والله علشان أعمله عقيقة، علشان افرح بيه زي ما أي حد بيفرح بابنه، وأنا راجع في الطريق في نص الدائري بالظبط، فيه طلعت صفط واكتوبر على الشمال، فأنا ماسك نص الدائري علشان أنا بيتي في حدائق الأهرام، فمش هينفع امسك يمين أو شمال الطريق، فالمرحوم الله يرحمه ويحسن إليه وينور قبره، أنا مخبطوتش من على الرصيف زي ما الناس بتقول، أنا لو خبطته على الرصيف زي ما الناس بتقول كنتوا هتلاقوا الخبطة عندي في العربية على اليمين، أنا الخبطة عندي على الشمال، وفيه واحد كان جنبي بعربيته برضو خرج وقال اللي حصل مع اني معرفوش ودافع عني".
وأضاف: "ربنا يعلم أنا عملت ايه علشان الراجل ده والناس دي وربنا يعلم، فأنا الناس قالت عليا إني بدوس على الناس بفلوسي، أنا عليا الحرام من ديني والدي متوفي من وأنا عندي سنة، عيشت عمري كله مع أمي وأخويا، فاحنا شوفنا كل المراحل اللي انتوا تتخيلوها، حتى تحت فقر الخط شوفناها، فربنا كرمني من سنتين تلاتة، فأكيد ربنا مكرمنيش بالفلوس اللي هدوس بيها على الناس واجي بيها على حد زي ما بتقولوا".
واختتم: "أنا مكنتش عايز اطلع أرد، بس أنا دلوقتي ممكن انزل ومتشوفونيش تاني، وبسبب الكلام ده لبست حوارات مش حواراتي، مع ان أنا أغلب من اني أعمل أي حاجة في الدنيا غلط، أنا محتاج دعمكم جدا، ومحتاج كل اللي بيحبني يقف معايا، محتاج كل الناس اللي فرحتها تدعيلي، وأنا راضي بقضاء ربنا وواثق في القضاء المصري، أيا كان القضاء هيكون ايه، فانا واثق في ربنا وخليكوا فاكرين ان أنا أقل خلق الله، فانا عمري ما همشي ادوس على الناس بفلوسي، ولا حيلتي فلوس اللي هي تخليني امشي ادوس على الناس بيها، وشكرا".
