أزمة شيرين عبد الوهاب وروتانا تتفاقم.. وعزيز الشافعي: المطربة هتدفع 20 مليون
نشر الملحن عزيز الشافعي مقطع فيديو يتحدث فيه عن تعاونه الأخير مع شيرين عبد الوهاب، وطريقة طرح الأغنيتين عبر موقع تيك توك، وحذفهم من اليوتيوب.
الملحن عزيز الشافعي يعلق على أزمة شيرين عبد الوهاب وروتانا
علق الملحن عزيز الشافعي، على أزمة منع طرح أغنية أتمنى أنساك على يوتيوب ومنصات الموسيقى المختلفة، بسبب أزمة شيرين مع شركة روتانا.
وقال الشافعي في فيديو رصدته الأيام المصرية : كان لازم اطلع اتكلم على اللي حصل امبارح علشان الناس تبقى عارفة رأيي في اللي حصل، امبارح نزل لشيرين عبد الوهاب أغنيتين لها من ألحاني وكلماتي، مبسوط جدا لأن الغنوتين دول بالذات نزلوا، المشكلة بس إني كان نفسي ينزلوا بطريقة أحسن من كده، والناس تشوفهم وتسمعهم على اليوتيوب ونشوف النجاح بالأرقام والمشاهدات والشهادات، شوفنا ده على تويتر واليوتيوب شوية قبل ما روتانا تقفل الأغاني، فده اللي كان مضايقني، أنا عارف شيرين عملت كده ليه، ولآخر لحظة بكلم شيرين، شيرين كانت وعدت جمهورها إنها هتنزل أغاني، وأصعب حاجة على الفنان، إنه يبقى عايز ينزل ويغني وعايز يشتغل ويتمنع علشان ورق أو إجراءات أو توقيعات أو عشان وجهات نظر أو عشان مواقف قانونية.
عزيز الشافعي: شيرين هتدفع 20 مليون جنيه بسبب طرح الأغنية
تابع عزيز الشافعي: معرفش كان ايه المفروض يحصل، أنا بسمع من محامي روتانا كلام محترم، لكن برضو بيقول مثلا إن شيرين دفعت 10 مليون جنيه أو 8 مليون علشان مش شرط جزائي لا عشان بس إخلال بالعقد، وإن في كل إخلال بالعقد هتدفع 10 مليون جنيه، يعني الاغنيتين دول هتدفع عليهم 20 مليون جنيه، والفلوس دي مش مخصومة من الفلوس اللي خدتها شيرين ولا عقدها وقف، العقد لسه شغال وهي مطالبة تقدم معاهم أغاني".
وأكمل : من الناحية التانية محامي شيرين، هل انت ورقك سليم ان انت تنزل اغاني، ولو سليم إزاي روتانا وقفت الأغاني، هل روتانا عندها حق ولا معندهاش، ليه الأمور دي متنتهيش بشكل واضح".
واضاف: مش معقولة اتنين محاميين كبار مش عارفين نفهم منهم، كل واحد بيقول كلام عكس بعض، كل ده مش مشكلتنا، المهم نسمع شيرين، احنا عندنا شيرين واحدة في مصر زي ما عندنا أنغام واحدة بس وكل الفنانات العرب، فاحنا عايزين أغاني شيرين تنزل ونفرح بيها، وعايزين أغانينا تنزل، ونفرح بيها، أغنية اللي قابل حبيبي، قعدنا أكتر من سنة بنعمل الأغنية دي عشان شيرين هي اللي تغنيها، وفرحنين واحنا بنسمعها بصوت شيرين عبد الوهاب، فكان المفروض الأغنية تنزل بطريقة أحسن من كده".
واختتم الفيديو بأنه حزين لأن أغنية اتمنى انساك طرحت بطريقة لا تليق بها، ثم حذفت من على موقع اليوتيوب، وأنه يريد أن تخرج شيرين من الأزمات والمشاكل التي تمر بها، لتعود للجمهور من جديد، ثم قدم جزء من أغنية اللي يقابل حبيبي بصوته.
