حلّ الشاعر الغنائي أيمن بهجت قمر، ضيفًا على برنامج “بالخط العريض” المذاع عبر فضائية “الحياة”، وكشف خلال اللقاء كواليس جديدة عن مشواره الفني، وتجاربه مع الفنانين، وتفاصيل خلافه مع الفنان حسين الجسمي.
وخلال السطور التالية ترصد “الأيام” أبرز تصريحات أيمن بهجت قمر في “بالخط العريض”:
- وفاة والدي كانت السبب في اتجاهي لكتابة الأغاني.
- مقدرش أضيف لحد حاجة، أنا بضيف لنفسي إني حاجة جيدة ومميزة، ولكنهم نجوم كُبار.
- بهاء سلطان صوت مفتقده وسلاح في إيدي مش معايا، ده صوت مصري جدًا، وزي ما اهتميت بـ حسين الجسمي، لازم اهتم بصوت بهاء، وهعمله أغنية نازلة قريب في فيلم تحت تهديد السلاح.
- علاقتي بـ عمرو دياب من قبل ما اشتغل معاه بـ 7 سنين، هو كان يعرف والدي، ولكني اتعرفت عليه من خلال الموزع الكبير طارق مدكور.
- تامر حسني معلم كبير ومدرسة في التسويق.
- محمد حماقي زكي جدًا وموهوب جدًا ولكن تقيل أوي، والتقل ده في الزمن اللي إحنا فيه بيضيع حاجات كتير.
- أغنية لسه بتحبوا يا قلبي، بداية تعاوني الحقيقي مع عمرو دياب.
- أنا محظوظ بتاريخي مع عمرو دياب، وولادي من بعدي يعتزوا بيه.
- شيرين مركزة جدًا بقى لها فترة، وعامل لها أغاني حلوة وسعيد بيها، وهي مختارة أغاني رائعة.
- شيرين هتعمل بروباجاندا الفترة الجاية، ومصر مافيهاش كتير زي شيرين هي شيرين واحدة، وصوت قريب من قلوب المصريين، وطبعًا الصناعة محتاجة لأصوات شيرين.
- شيرين تختار أغانيها بحرفية، وعندها سينس عالي، وتستعد لطرح أغنية جديدة بالتعاون مع عمرو مصطفى وأمير طعيمة ستكون مفاجأة، وطبعًا شيرين كوكتيل من الأصوات لأن صوتها شقي وحزين وقوي.
- شيرين ابتعدت فترة عن طرح الألبومات، ولما نزلت أغنية الناس كلها غيرانة عملت ضجة، لأن الناس بتحب شيرين.
- أنا أكبر من التحدث في شئون مالية مع حسين الجسمي لكني أقول له ابعد عن حقوق أولادي، قدمنا معا أكثر من 20 أغنية منها 15 كسرت الدنيا.
- أنا وحسين الجسمي عدينا مرحلة إننا نتخانق على التنازلات وصيغتها، لأن مفيش بينا كده احنا أخوات ومفيش بينا شيطان، وفي بينا نجاح وكيمياء حلوة.
- تفاجأت إن حسين الجسمي، باعت صيغة تنازل ملهاش أي مبرر، كأني بديله حقوقي وحقوق ولادي وأحفادي، يعني بديله كل حاجة وكأن أنا ليس لي أي حق أدبي ولا مادي في الأغنية، وبلا مبرر، وقولتله المنطقة بتاعت التنازلات والعقود دي بيدخل فيها الشيطان، وأنا عمري ما غدرت بيك في حاجة ولا بعتلك أي إنذار، وعمري ما طمعت فيه، وأنا مفيش خلاف لي مع حسين على حاجة، ولكنه عايز ياخد كل الحقوق اللي بينص عليها قانون الملكية الفكرية، ولكن في حقوق لا تنازل عنها، زي حقوق الأداء العلني، وحقوق إعادة النشر، ولو الأغنية حد عايز يعملها إعلان.