الحكومة أفقرت الشعب وكفاية عليها كده.. في تعليقه على الحساب الختامي لموازنة الحكومة ٢٠٢١/٢٠٢٢ ؛ هاجم النائب فريدي البياضي عضو مجلس النواب و نائب رئيس الحزب المصري الديمقراطي الاجتماعي، الحكومة بسبب أدائها.
وقال البياضي: في كلمات مختصرة، أوجه كلامي للحكومة وأنا أرفض التقرير و أقول باختصار “كفاية.. كفاية ديون.
وأضاف النائب: غرقتونا.. الوزير بيقول أرقام ونسب وبيحاول يثبت أن نسبة الدين في تحسن، يا إما أرقامك وهمية يا وزير، وأنا متأكد من كدا لأن ال٨٧٪ دول مش حاطط فيهم ٢٤٪ ديون الهيئات الاقتصادية وحاسب سعر الدولار على ١٨! يا إما لو أنت صح يبقى إحنا اللي واهمين، والمواطن اللي بيعاني كل يوم وبيصرخ دا مواطن مش حقيقي.
وأضاف: إحنا بنتكلم على إجمالي ديون تعدت ال ١٠ تريليون وتجاوزت إجمالي الناتج المحلي وفوائد ديون بتاكل نصف المصروفات.. كفاية انتهاك للدستور، حرام عليكم أنتم أقسمتم على احترامه.
وتابع: النسب اللي حددها الدستور للتعليم والصحة في ٢٠١٤ واللي مفروض تزيد كل سنة، الحكومة ما بتصرفش ربع النسب دي، الوطن لن ينصلح حاله إلا لما تعرفوا أهمية وأولوية التعليم و الصحة، وتعرفوا أن الحل في الاستثمار في البشر مش في الحجر.
واختتم النائب كلمته قائلا: كفاية على الحكومة، إحنا قدام حكومة لا تحكم، ولا تستطيع أن تحكم.. حكومة حققت العدالة الاجتماعية بأن أفقرت كل طبقات الشعب، بلا استثناء، من 3 سنين تحت قبة المجلس طالبت وحدي بإقالة الحكومة، واليوم مع كثير من النواب ومع جموع الشعب نصرخ.. كفاية كفاية كفاية.