كشفت ميرفت أبو عوف، شقيقة الفنان الراحل عزت أبو عوف، عن كواليس مواقف حدثت معهم في منزلهم بمنطقة الزمالك بالجيزة، والذي كان يُقال عنه أنه «مسكون».
قالت ميرفت أبو عوف إن صاحب المنزل كان سلفادور شيكوريل، وهو كان رجل شهير جدا، وقُتل في هذا المنزل بالفعل، ولكن والدها لم يكن يعلم هذا الأمر، «لما اتقال لبابا أن البيت مسكون مكنش مهتم وقتها بالكلام ده».
ميرفت أبو عوف تروي مواقف حدثت في منزلهم المسكون
وأضافت «أبو عوف»، خلال لقاء خاص مع برنامج «الستات» المذاع عبر فضائية «النهار»، ويقدمه كلا من سهير جودة ومفيدة شيحة، أن منزلهم في الزمالك كان فعلا مسكون، «جنبا شيخ بالفعل وقرأ قرآن وحاجات وانصرف الجن من البيت، ولكن قعدنا بتاع سنين طويلة في البيت وهو مسكون، كان فيه روح مسكونة في البيت بالفعل».
واستكملت ميرفت أبو عوف: «البيت كان مسكون، ووالدتي كانت بتشوف شيكوريل ده نفسه، والبيت بتاعنا مكتوب من أشهر البيوت المسكونة، أمي كانت الوحيدة اللي بتشوفه في البداية، وبعد كده أكتر من حد بدأ يشوف العفريت ده».
وواصلت أنهم اعتادوا على الأمر ولم يكن لديهم أي تخوف من الأمر، «مكناش خايفين اتعودنا على البيت بعد كده والعفاريت اللي فيه، ولكن الموضوع دايقنا لأن صحابنا كانوا خايفين يزورونا، وكانت حاجة مش لطيفة لينا، بس البيت كان مسكون وكنت بشوف وشوش غريبة على الزجاج».