أثار قرار فصل الطالبة سارة هشام، من كلية الحاسبات والمعلومات، بجامعة المنيا، حالة من الجدل عبر مواقع التواصل الاجتماعي، بعد تعرضها للتعنت من جانب، الدكتورة منال عبد القادر عبد الفتاح يوسف، وكيل كلية الحاسبات، بكلية الحاسبات والمعلومات، جامعة حلوان، وفقًا لما ذكرته الطالبة في رسالة تداولتها كل مواقع السوشيال ميديا، والتي نعرضها بالتفصيل كما جاءت، والتي تقول فيها:
طيب يا جماعة معلش البوست ممكن يبقي طويل شوية، بس أتمنى تقرأوه للآخر علشان تشوفوا، إن ممكن السلطات توصل لأيه، وإن عادى يبقى فيه إهمال وظلم وتعسف بالشكل ده.
انا سارة كنت طالبة فى كليه حاسبات ومعلومات جامعة حلوان، حصل معايا موقف تعسفى واضح جدًا من وكيلة الكلية.
الوكيلة طلعتنى من قدام لجنتى لمادة أخلاقيات المهنة (الفاينال)، وأنا معملتش حاجة، وكنت داخلة في الوقت المسموح فيه بالدخول من البوابة، اللى فالدور الأول عندنا في الكلية ونزلت البدروم، ودكتورة منال عدت من جنبى وأنا نازلة من سلم الدور الأول للبدروم، وبعدين كملت ووصلت قدام لجنتى، اتفاجئت إن الوكيلة عمالة تنده عليا، فروحتلها فقالتلى إطلعى مفيش امتحان.
أزمة طالبة جامعة حلوان مع وكيل كلية الحاسبات جامعة حلوان
فقولتلها ليه يا دكتور يعنى إيه السبب لكده مرضيتش تقول حاجة وقالتلى تعالى بعد الامتحان، فى مكتب السكرتيرة فقولتلها يا دكتورة أنا لازم امتحن المادة دى، علشان ميحصلش معايا مشكلة في الكلية ومينفعش أطلع وهطلع ليه أصلًا قالتلى اطلعى بدل ما أجبلك واحدة تطلعك.
فقولتلها يا دكتور أنا مريضة سرطان وجايه الامتحان، وأنا تعبانة قالتلى ألف سلامة بكل استهزاء وسخرية، وقالتلى أنى كمان هعملك محضر علشان بتعملى تشويش على اللجان، علشان مكنتش عاوزة أطلع علشان أنا معملتش حاجة تستدعى أنى أتحرم من الامتحان، وكان لازم امتحن كل المواد اللى سجلتها الترم ده.
ولما يأست طلعت برة الكلية ولما الامتحان خلص، روحت لمكتب السكرتيرة وقابلت دكتور منال وسألتها ليه طلعتينى من الامتحان؟ فقالتلى علشان كنتى ماشية بالراحة ومش بتجرى، قولتلها يا دكتور أنا قولت لحضرتك أنى مريضة ومعايا كل حاجة، تثبت ده قالتلى تانى ألف سلامة بكل استهزاء، وقالتلى كنتى تيجى بدري وتمشى على مهلك، قولتلها يا دكتور أنا كان عندى امتحان امبارح، وطريقى ساعتين مع التعب أصلا مش بعرف اتنفس، ولا أعمل مجهود، وكمان موتسيكل خبطنى أول يوم امتحانات، سكتت ومردتش.
وبعدين قالتلى قدمى طلب إن المادة دى تتحفظ بأعمال السنة للسنة الجاية، و هشوف اذا كان هيتوافق عليه ولا لأ، فقولتلها يا دكتور أنا محتاجة أن المعدل التراكمى بتاعى يترفع، ولازم امتحن كل المواد اللى سجلتها، ومينفعش أشيل مواد علشان متفصلش علشان تعبى، وإني أصلًا كنت مأجلة حاجات المفروض أعملها بالمستشفى، علشان أبقى قادرة وفيا شوية طاقة أنى امتحن.
دكتور منال عبد القادر تعنتت مع طالبة مريضة بالسرطان وحرمتها من الامتحان
فبرضو صممت أنى أعمل الطلب ده، فعملت الطلب وبعدها روحت لإدارة الجامعة، لمكتب النائب محدش ساعدنى.
وهناك قالولى “السكرتاريه” ممكن تعملى طلب باللى حصل، وهيروح للكلية ويردوا عليه، يأما تخلى المشكله مع الوكيلة، ومتقدميش طلب فقولت خلاص مش هعمل طلب علشان الوكيلة متضايقش وتيجى عليا أكتر، وتستقصدنى “على اساس أنها كده مكانتش مساقصدانى”، وروحت لها في الإجازة مرة وقولتلها طيب يا دكتور مفيش أى حاجة أقدر أعملها، علشان لقدر الله المعدل التراكمى بتاعى، ميبقاش عرضة لفصلى، فقالتلى إذا كنتى عاوزة تعملى أى حاجة، كان متاح من قبل مرور 48 ساعة على الامتحان.
لا والله بجد!!! هو مش كنت أنا عند حضرتك في المكتب منهارة، بموت على أى حاجة تنقذنى، خصوصًا أن كمان حضرتك السبب وحرمتينى من الامتحان بمزاجك، و لا لائحة ولا قانون يديكى الحق تحرمينى من الامتحان، أنا مقولتلهاش كده علشان كنت محترماها من اول ما ندهت عليا من قصاد لجنتى.
ازاى حضرتك تبقى وكيله الكلية لشئون التعليم والطلاب، ومتدنيش كل الحلول اللى تنقذنى، في موقفى ده وحضرتك عارفة كل ظروفى اللى استهزأتى بيها.
يعنى ليه دكتورة تعمل كده مع طالبة وتدوس عليها بالشكل ده، من غير وجه حق وإن مفيش لائحه ولا قانون، بيقول إنها تطلعنى من الامتحان وتحرمنى منه، علشان مش ماشيه بسرعة! وبعدين دى ماشية واحدة مريضة، ومش قادرة يعنى، هو إزاي فيه ظلم واستهتار بالمرض كده؟ وكمان كان فيه ناس داخلة معايا في نفس الوقت، وعندنا بالكلية مسموح ندخل الامتحان، طالما البوابات مفتوحة سواء أى باب من التلاتة وإذا الباب اتقفل يبقى مينفعش تدخل، وانا الحمد لله كنت دخلت والباب مفتوح، هكون دخلت إزاي من عقب الباب!!! أكيد لأ.
عميد كلية الحاسبات خاف من وكيل الكلية ورفض مساعدة سارة هشام
وكمان الكل مستغرب الفعل اللى الوكيلة عملته معايا، ومش لاقين لها مبرر إنها تعمل معايا كده، وبعدين استنيت الوقت اللى وكيلة الكلية قالت، إن نتيجة الطلب بتاعى هيطلع فيه (اللى هو المادة تتحفظ بدرجات أعمال السنة للسنة الجاية) عرفت أنه اترفض، وإن الوكيل قالت للسكرتيرة ارفضى طلب البنت ده، أنا بالذات يعنى ليه برضو؟ كل ده أنا مش فاهمة
وسكرتيرة الوكيلة أصلًا كانت عمالة تعيط علشانى، وبسبب الظلم اللى أنا اتعرضت له، وعمالة تدعيلى ومكنتش عارفه ليه، الوكيلة بتعمل معايا كل ده
فأنا قلت أنا كده اتفصلت، علشان المعدل التراكمى بتاعى موصلش المطلوب، هو زاد آه بس موصلش للى كنت عاوزاه، علشان متفصلش، بسبب أنى شيلت المادة وسقطت فيها، وإنها متحفظتش للسنة الجاية علشان الوكيلة (دكتور منال رفضت الطلب).
وكمان اللى حصل اليوم ده، أثر على تركيزى بشكل كبير، ومعرفتش أحل في المادة اللى بعدها كويس، بسبب الانهيار اللى كنت فيه (نجحت في المادة اللى بعدها بس بتقدير أقل من المواد اللى امتحنتها قبل الواقعة دى) فبرضو كان عليه تأثير على المعدل التراكمى.
مع العلم إني عرفت من سكرتيرة الوكيلة أن مادة اخلاقيات المهنة، اللى الوكيلة حرمتنى من امتحانها دى، كان نسبة النجاح فيها ١٠٠% وإني كنت جايبة درجة عالية فى أعمال السنة، فإذا كنت امتحنت المادة كنت هنجح فيها، وحتى إذا كنت جبت فيها أقل تقدير، مع أسوأ الظروف كان هيرفعلى المعدل التراكمى وكان هينقذنى من الفصل.
وكيل كلية الحاسبات سحبت تظلم فتاة السرطان لحرمانها من التظلم
ولما عرفت إن الطلب اترفض روحت لمكتب العميد، وقولتلهم أنى عاوزة أقابل العميد و قولتلهم اللى حصل، والسكرتير كان فاكر اليوم ده، وكان فاكر اللى حصل فيه، وكان مستغرب من اللى الوكيلة عملته، وقالولى اكتب طلب باللى حصل علشان العميد يشوفه، علشان مكانش فاضى يقابلنى فعملت كده وروحتلهم بعدها بكام يوم، علشان أشوف إيه اللى حصل، فالسكرتير قال إنه قال للعميد اللى حصل، والعميد كان شافنى اليوم ده وقالى انتى بنتى وفوق دماغنا، ومش هتتفصلى وقال ليا آجى يوم تانى فروحت اليوم ده، لاقيته بيقول أنا متأسف مش هقدر أعمل حاجة، فانهرت من العياط وقولت طب ليه يا دكتور، فقال دى اللوائح، قولتله طيب أنا عارفة إن دى لوائح بس اللى الوكيلة عملته معايا ضد اللوائح، ومخدتش فرصتى كاملة، فقالى اكتبى طلب تانى هدخله فى مجلس الكليه، و نتناقش فيه.
عملت كده وقدمت الطلب وقدمت معاه كل التقارير الطبية، و كل حاجة تثبت المرض، والسكرتير قال ليا كمان، أروح لحد معين فى إدراة الجامعة فروحت هناك، وقولت أنى عاوزة اعمل شكوى في كلية حاسبات (وكيلة الكلية دكتور منال عبد القادر) فأول ما عرفوا إن الشكوى عليها، قالوا مش بيجى من عندهم غير المشاكل والمصايب يعنى الكلية معروفة بالظلم عندهم من بدرى، طب ليه ساكتين عليها كده؟
علشان مسنودة من بره جامد أوى وده كلام سكرتير العميد، فمش بيهمها حد ولا حد يقدر يكلمها ولا يناقشها فى قراراتها حتى العميد، فالأستاذة اللى روحتلها فى إدارة الجامعة، كلمت العميد وقال لها أنه بيشوف موضوعى لسه، فقالتلى الأفضل تخلى تعاملك مع العميد وتشوفى رده هيكون إيه؟
و لما روحت الكلية تانى، العميد قالى لسه المجلس متعملش، بس أنتى خلاص معانا، وسجلى المواد واحضرى وانتى حالة خاصة بسبب اللى حصل معاكى يوم الامتحان، بسبب ظروفك المرضية بس أبقى تعالى يوم كذا.
التعتيم على فضيحة فصل الطالبة لأن وكيل الكلية مسنودة وبيخافوا منها
فروحت اليوم اللى قال عليه العميد، قالوا إنه للأسف مش هينفع أرجع وخلاص هتتفصلي، فقولتله ليه (سكرتير العميد) قال الجواب مش عندى، واطلعي لسكرتيرة الوكيلة ولما طلعت قالتلى انا يابنتى معرفش حاجه والله، واتصلت على سكرتير العميد، فقال لها بينها وبينه أن وكيلة الكلية شالت الطلب بتاعى وركنته، علشان ميدخلش المجلس علشان ميتناقشوش فيه، علشان ميبقاش فيه فرصة أن يتوافق عليه، ومتفصلش وسكرتيرة الوكيلة قالتلى اللى حصل ده، لما هى عرفته علشان كانت شيفانى هتجنن خلاص.
ونزلت معايا السكرتيرة لمكتب العميد وقالتله اللى بيحصل في البنت ده حرام، فالعميد قال خلاص هيشوف الموضوع، وبعدين أخدت ميعاد صريح أقابل فيه العميد، فخدنى وطلع لوكيلة الكلية واتكلموا معايا، وقال إنه بمجلس واحد يقدر يرجعنى الكلية تانى، بس أجيله فى يوم معين حددهولى بشكل عشوائى، (علشان يخلينى مروحلهمش تانى لحد ما يمضى على القرار و ميبقاش ليا أى حق).
بس انا فاليوم ده روحت لمكتب النائب فى إدارة الجامعة، وأصريت أنى اقابله علشان حسيت إن العميد مش مراعى ظروفى، وعمال كل شويه ينيمنى فقولت أروح للنائب احتياطى، بس النائب مرضاش يقابلنى والسكرتيرة كانت عارفة الموضوع، وقالتلى اكتبى طلب بيه فكتبت الطلب، والسكرتيرة اخدت رقمى علشان لما النائب يكلم العميد، تعرفنى إيه اللى حصل فاستنيت كام يوم و محدش اتصل، فروحتلهم فى إدارة الجامعة تانى، فمكتب النائب قالتلى السكرتيرة أنه مكانش فاضى خالص، ومكلمتوش بالموضوع فمشيت، وبعدها بكام يوم اتصلت بيا.
العميد قال للطالبة: كله هيبقى تمام وقام بفصل سارة هشام
وقالت إن العميد قال إن الموضوع منتهى، ومش هينفع أرجع قولتلها إزاي وانا مأخدتش الترم اللى فات كامل، واللى عملته الوكيلة معايا هو السبب، فقالتلى خلاص ماشى أنا هبلغه(هتبلغ النائب)، وبعدها بكام يوم اتصلت بيها فعرفت أن الطلب هيروح الكلية والعميد هيرد عليه بس سبحان الله، لحد انهارده مفيش رد على الطلب أصلًا، وسكرتير العميد قال ليا إن فيه حاجه بيبقى اسمها متابعه، يعنى بيتابع الطلب مع إدارة الجامعة علشان يوصلهم الرد، فقال ليا إن العميد مبلغهوش برد يكتبه، ويوصله لإدارة الجامعة، فمعنى كده إن العميد مبصش فالطلب أصلًا.
وكمان كنت فى يوم روحت، للدكتورة منال مكتبها علشان أقابلها، فرفضت إنها تقابلنى وقالت مش بتقابل طلبة دلوقت، فقولت للأستاذة وفاء السكرتيرة، إني عندى معاد مستشفى والمستشفى بعيدة، ولازم الحق أروح أعمل تحاليل، فقالتلى هى مش عاوزة تقابلك، وسألتها حتى إذا استنيت الوقت اللى بتقابل فيه الطلاب فقالتلى آه.
وبعدين أهلى كانوا مش مستوعبين، ليه دكتور منال بتعمل معايا كده، فحد من قرايبنا راح لمسئول عندنا فى الكلية، قالتله هو إزاي فيه ظلم كده، فقال لها أنا مقدرش أتدخل علشان محدش بيقدر يقول لها كلمة، وأنا مش عارف بتعمل مع البنت كده ليه، وقال إنه مش عارف يدافع عنى حتى علشان ممكن ترد عليه بكلام مش كويس!! وكمان قالوا إن وكيلة الكلية مش بتحترم حد خالص،
حرمان الطالبة من فرصة المعدل التراكمي وحرموها من أداء الامتحان
وبعديها بابا كلم صاحب ليه يعرف دكتور أسامة العميد، والمكالمة معايا متسجلة، بيقول فيها إن الوكيلة بتحبنى ومعتبرانى بنتها!!! بجد بتحبنى ومعتبرانى بنتها، أومال إذا كنت عدوتها كانت هتعمل فيا إيه؟ وبالمنطق هتطلعنى من الامتحان ليه وانا داخله فالوقت المسموح، وترفض طلب المادة ليه وتشيل الطلب علشان ميتناقشش في المجلس ليه، وتأثر على العميد علشان يغير موقفه ليه ويفصلنى.
وكمان لما صاحب بابا كلم العميد قاله، إني أخدت 6 فرص علشان المعدل التراكمى بتاعى يزيد، بس سبحان الله الواحد بيخلى اللى ظلمه، يقع قدامه فالكلام علشان يكون طوق نجاه ليه، علشان وكيلة الكلية كانت قالتلى لما كنت في مكتبها في مرة، إني اخدت 6 فرص، وأنا اصلًا حسبتهم وبأثبات من كارت الطالب في الكلية، انهم 4 والخامس اللى حصل فيه المشكلة، يعنى معنى كده إن العميد أصلًا كل ده مدرسش حالتى، وبيقول الكلام اللى دكتور منال بتقوله وبتأثر عليه بيه.
يعنى دكتور منال بتقول كلام مش صح، علشان تكمل ظلم فيا والعميد مقتنع بكلامها ومش بيراجع وراها، طب إزاي ده قرار فصل وتدمير مستقبل وضياع تعب سنين مش لعب عيال؟ ميستحقش من العميد انه يشوف كارت الطالب بتاعى، ويشوف كلام الوكيلة صح ولا غلط!؟
كمان الوكيلة مستكفتش بكل اللى عملته، كمان حرضت شئون الطلبة عندنا في الكلية، بأنهم ميساعدونيش ولا يدونى أى معلومة تفيدنى وقعدوا يزعقولى، وطردونى وقالولى أن كلامك مع دكتور منال أو العميد.
الكل رفض مساعدة طالبة السرطان بسبب جبروت وكيل كلية الحاسبات
وبعدها روحت لأمين الكلية علشان أسأله عن بار كود، قالولى عليه في البريد علشان أشوف جواب الفصل راح فين، علشان كل ده لسه موصلناش البيت، وإحنا كننا محتاجينه، فأمين الكلية قال مقدرش أديكى حاجة علشان كده، هتعرض للتحقيق اللى هو للدرجة دى، مش عاوزة حد يفيدنى بحاجة في الكلية ومهدداهم؟!
وكمان صاحب بابا اللى كلم العميد، قال لبابا إن دكتور منال سلطتها كبيرة، وأذت ناس كتير وممكن تأذينى فبابا خاف عليا، بس أنا عملتلها إيه علشان تأذينى؟ أنا كنت عاوزة حقى، ومتفصلش علشان أنا كان من حقى آخد الترم ليا كامل، وميحصلش فيا كل ده.
ومعايا اثباتات من طلبة كتير كانوا بيحاولوا يساعدونى، وناس متخرجة كمان، أنها بتيجى على ناس كتير وبتأذى ناس كتير، وكمان بتمشى بالوسايط على مزاجها، و كل حاجة كتبتها في البوست ده، فأنا معايا ليها إثبات ومكالمات مسجلة وتسجيلات وطلبة شاهدة باللى حصل، وطلبة شاهدة إن دكتورة منال بتظلم الطالب، وبتدعى محبتهم واثبات كمان أنها أذت ناس كتير، واثبات أنها بتمشى بالوسايط على مزاجها وبيمشوا الدنيا بالمصالح، بس اتفاجئت من كام يوم، إنه خلاص مضى على جواب الفصل، فعرفت إنهم كانوا بينيمونى ويهدونى، على ما القرار يطلع ويمضوه، علشان مروحش اشتكيهم على اللى بيعملوه ده، وبجد الأيام اللى فاتت كانت جحيم فى حياتى.. حسبى الله ونعم الوكيل.
وآسفة جدًا إنى طولت عليكم، بس هو الموضوع طويل وكنت عاوزة أوصل لكم كل حاجة حصلت بالظبط.