أشاد الإعلامي عمرو أديب بخطوة الرئيس عبد الفتاح السيسي خلال مؤتمر “حكاية وطن”، حيث دعا إلى توفير مساحة إعلامية أوسع للمسئولين والوزراء ليتحدثوا بشكل أكبر عن حقائق الأمور والإنجازات والمشروعات.
خلال برنامج “الحكاية” المذاع على قناة “mbc مصر”، قال عمرو أديب: “سيادة الرئيس، نحن بحاجة إلى أن نعرف كيف نتحدث، أنا أستغل تحريضك للمسئولين لكي يتحدثوا بشكل مفتوح، نحترم ظروف البلاد ولكننا أيضًا بحاجة للتحدث والتعبير بحرية أكبر.”
وأضاف: “الإعلام الذي لا يحصل على الفرصة، لن يكون مفيدًا للدولة. يجب أن يحتوي الإعلام على آراء متنوعة، نريد أن نتقدم في مسألة حرية الإعلام. أناشدك في الست سنوات القادمة، اسمح لمئة زهرة بالتفتح لأن دائما تقول اتكلموا واحنا بنسمع وطلباتكم مادامت في صالح الوطن أوامر .”
وقال أديب: “هل تعلم، يا سيادة الرئيس، أن هناك كتّاب يتم منعهم من نشر مقالاتهم في الصحف بشكل متكرر؟”
وتابع: “لو عايز اعلام كويس يا سيادة الرئيس سيبنا نشتغل وحاسبنا والناس تسمع وتقول، وكل الشخصيات ميبقاش عليها أي حاجة، ومببقاش قلقان لو قلت أي شئ، ده لو عايز إعلام ينور ويوعي”.
عمرو أديب للسيسي: هتعمل إيه الـ6 سنين اللي جاية؟
وأضاف: “أنا بستغل الفرصة اللي انت فتحتها النهاردة بخصوص قولوا للناس الحقيقة، أن الـ6 سنين اللي جاية يتفتح المجال للإعلام ياخد راحته”.
وأكمل:”سيادة الرئيس أنت قلت على اللي حصل السنين اللي فاتوا هل مش من حقنا بقى أننا نسأل إيه اللي هيحصل الـ6 سنين اللي جاية، احنا مش لاقيين حد يكلمنا ولا يرد علي اسئلتنا، تريد اعلام مميز ومساند دائما سيب له مساحة حرية يسأل ويعرف الحقيقة”.
واستطرد: “لما قلت إن مينفعش الإعلام يسيء لحد أنا بقول لحضرتك أن كان شغلي في وقت طويل أني أرد وادافع عن البلد ومكنتش إساءة احنا كنا بنرد على الناس اللي كانت بتحط عناوين وأرقام الضباط اللي كانوا بيتم اغتيالهم بالليل، وبنرد على الناس اللي بتقول امنعوا المساعدات عن مصر”.
وواصل: “بطلب باسم الناس اللى بعتبر نفسي واحد منهم لو سمحت ادينا الفرصة بقى الفترة اللي جاية دي نتكلم ومببقاش حاسس بقلق، احنا بنتكلم علي 20 توك شو من الساعة 8 لغاية 1 الصبح، وانت قلت لنا اننا خلاص مستقرين وبفضلك وبفضل القوات المسلحة تجاوزنا فترة القلق، فلو سمحت اعطونا فرصة نتكلم أعطوا فرصة لكل الناس تعبر”.
وتابع: “سيادة الرئيس لما بتتكلم الأجزاء التي تشعر أنها مهمة للناس هي اللي فيها جدل ومصارحة ودي اللي بتصنع وعي للناس، أنا عندي جمهور كل يوم بيسألني هتعرف تتكلم في النقطة دي؟ ونقعد نتناقش أنا وفريق الإعداد بنقعد في حالة صعبة ودلوقتي عمالين يكتبولي علي الشاشة انت مجنون علشان بتكلم في حرية الإعلام، لأ أنا مش مجنون دي شغلانتي وأنا بفهم فيها”.
وأردف: “خلي كل الأصوات يا سيادة الرئيس تتكلم.. ماذا حدث في الحوار الوطني؟ احنا محتاجين نتكلم زي ما انت بتتكلم قول للناس الحقيقة حتى لو الواقع صادم، الـ6 سنين القادمة لازم نبنيها بقدرة كبيرة من الاحتواء ومحدش يقولي آه علشان البلد تتهد، احنا بنتضرب كل يوم بالصواريخ بقالنا 10 سنين من قنوات خارجية حصل ليك ايه؟ ولا حاجة الناس بتروح شغلها والأمور عادية، أنا عارف إن الحرية قد تؤدي إلى الفوضى والتخوف شيء معقول ولكن مهم جدا لما آجي اطلع بالليل اتكلم لما أقول للناس الحقيقة علشان يصدقوني”.