هنأ الكاتب عمر طاهر، المطرب محمد فؤاد بمناسبة عيد ميلاده، وذلك عبر صفحته الرسمية على موقع التواصل الاجتماعي “فيسبوك”.
وكتب “طاهر” عبر صفحته قائلاً: “بمناسبة وصول محمد فؤاد لسن 60 أعتقد دي مناسبة لزملائنا نقاد المزيكا الشاطرين إنهم ينصفوا تجربة فؤاد و هي فعلا متعبية كلام و أفكار”.
وتابع : “سيب آخر كام عمل و هاته من الأول هتلاقيه في منطقته كان مغامر و مجدد و جرىء أكتر من منافسه الأشهر، هو أول اللي اشتغلوا مع عصام عبدالله. ياسر عبد الرحمن. فهد. مدحت الخولي. احمد منيب. مودي الإمام”.
وأضاف : “هو اللي قدم وليد سعد محمد رحيم مصطفى عوض عزيز الشافعي تامر عاشور، الوحيد في جيله اللي كانت انطلاقة نجاحه من غير حميد الشاعري اشتغل معاه بعدين”.
واستكمل حديثه قائلاً : “الوحيد في جيله اللي خاض تجربة جريئة ألبوم كامل مع احمد الحجار.. إزاي صوته وهو بيقول يا ليل بقى فاصل اذاعة الاغاني المصرية هو و ماحدش غيره من جيله. مواضيع أغانيه ماوقفتش في حتة واحدة .. فيلمين مع مخرج كبير زي خيري بشارة و فيلم غير خريطة السينما مع هنيدي”.
وتابع: “طلع من الفلكلور غنا و قدم تترات بقت تفصيلة في اسماع الناس.. طبيعة نظرة الناس ليه و شكل الحتة اللي سكنوه فيها”.
واختتم حديثه قائلاً: “تجربة مليانة كلام وكتابة و حاجات يتقدر تعبه فيها و حاجات فكت منه طبعا زي أي حد. بس إجمالا تجربة تستحق التقدير و تستحق انها تتحط في مكانها بالضبط و إن حد ينتشلها من منطقة اللطافة و القلش و كام عمل مش قد كدة مايلغوش اللي الراجل أنجزه بالفعل.. كل سنة و انت طيب يا فؤش”.