كشفت الإعلامية ياسمين عز، عن إتيكيت التعامل مع الزوج من قبل الزوجة، وذلك من خلال سبعة عوامل يجب الابتعاد عنها خلال التعامل مع الزوج، «في كام حاجة كده لازم تمنعيها وانتي بتتعاملي مع جوزك احفظيهم».
إتيكيت التعامل مع الزوج بطريقة ياسمين عز
وأضافت «عز»، خلال تقديمها برنامج «كلام الناس»، المذاع عبر فضائية «إم بي سي مصر»، أنه يجب الاعتماد أن الزوج شيء مهم جدا في الحياة، ويجب اتباع تلك الخطوات في التعامل مع الزوج المصري، وهي: «أولا في المطعم لو قاعدين في مطعم أو كافيه وواخدك يأكلك ويشربك مينفعش يبقى قاعد جنبك تتسحبي من لسانك وتتكلمي قبله مع الجرسون».
وتابعت: «ثانيا مينفعش تمدحي في حد أو تشكري حد غير جوزك وهو قاعد، ده هو برطمان العسل، والسكر وأبو الكرم كله».
وأردفت: «ثالثا لو جوزك نسي سهوًا محفظته أو فلوسه في البيت وانتوا بتشتروا حاجة أو معزومين في المطعم، أبعدي عن إنك تطلعي فلوس من شنطتك وتديهاله قدام الناس عشان دي حركة مخجلة ومهينة للرجل».
وأكملت: «رابعا لو قاعدة جنب جوزك مينفعش تتنفسي بصوت عالي وهو بيتنفس عشان عيب، ننظم النفس وننظم الحركة مع بعض، النفخ الكتير بيزود شحنة السلبية والنكد ما بينكم نظمي نفسك وهدي نفسك».
وواصلت: «خامسا لو قاعدين مع بعض في البيت مينفعش فجأة تقومي تقفي وهو بيتكلم تروحي الحمام، الحمام مش أهم منه».
وأسهبت: «سادسا مينفعش وانتي مع جوزك وقاعدين مع ناس وجوزك قال حاجة واتكلم مع الموضوع تطلعي زي القنفد وتطلعيه أنه مش فاهم حاجة وأنتي اللي فاهمة كل حاجة وفيلسوفة عصرك»
وأتمت: «سابعا لو انتوا خارجين مع بعض مينفعش تسألي جوزك على الطريق، متقعديش تقولي ليه سبت الشارع ده وخدت ده والكلام ده سيبي الراجل يتصرف».