محاكمة نبوية أنوش اليوم .. وخلال ساعات تصدر المحكمة الاقتصادية، الحكم على نبوية أنوش صاحبة قناة يوميات أنوش، لاتهامها بنشر الفسق والفجور من خلال فيديوهات أظهرت فيها مفاتنها لجلب المشاهدات والعائد المادي.
محاكمة نبوية أنوش اليوم .. بعد أن أدلت باعترافات تفصيلية أمام جهات التحقيق وكانت سببا رئيسيا في إحالتها إلى محاكمة عاجلة بعد أن أدلت تفصليا بتعمدها نشر فيديوهات الخلاعة .
محاكمة نبوية أنوش اليوم.. ننشر اعترافات صادمة قبل ساعات من دخول القفص
قالت نبوية أنوش في اعترافتها ” أنا أبويا كان بيشتغل موظف في شركة طرة للأسمنت، وأمي ست بيت، وعندي خمس أخوات ثلاث ولاد وبنتين، وكلهم أتجوزوا وأنا آخر واحدة اتجوزت فيهم لغاية لما رحت عشت مع جوزي، وأنا متجوزة من 2012 من جوزي اسمه عبد اللاه.م، وطلعت من تانية إعدادي مكملتش تعليمي، وكنت بشتغل عشان أساعد أمي، وكنت بشتغل في مصنع خياطة وفي محلات بياعة في محلات طرح وجزم وملابس حريمي.
كنا غلابة.. وبشتغل خياطة ب25 جنيه في اليوم
وأضافت أنوش أمام النيابة العمة أن عملها في الخياطة كان يدر عليها دخلًا قائلة: كنت باخد وأنا في تانية إعدادي وتالتة إعدادي 25 جنيه في الأسبوع لغاية ما وصلت 75 جنيه في الأسبوع، وكنت بديهم لوالدتي عشان مصاريفنا، وتوقفت عن العمل لما اتجوزت في 2012، وسكنت مع زوجي في كذا مكان أولهم الدواجن في حلوان، وبعد كده روحنا عزلنا وقاعدنا في حدائق حلوان في المكان اللي أنا اتمسكت فيه في المعصرة، والبيت ده إيجار باسم جوزي وأنا عاملة عقد صوري من صاحب البيت عشان أعرف أعمل توكيل للمحامي، وجوزي بيدفع 1800 جنيه في الشهر بالخدمات، وبيشتغل سمسار عقارات، ودخله في الشهر 5000 جنيه تقريبًا.
اتطلقت من جوزي ورجعت بورقة عرفي
وقالت كنت ساكنة مع جوزي في البيت لغاية ما خلفنا ولد وبنت الولد اسمه آدم والبنت اسمها سلمى لكن توفاها الله، كان عندها مشكلة في الرئة وتوفت، في 23 أكتوبر 2020، وأنا خلفتها بعد ما جوزي رجعني من الطلاق، لأني اتطلقت منه عشان كان فيه مشاكل ما بينا بسبب أمه وأخته، والكلام ده كان في 2016، ورجعنا تاني لبعض، وهو مردنيش رسمي كتبنا ورقة عرفي وفضلت عايشة معاه ورفعت دعوى إثبات جواز، عشان مكنش عايز يكتب عليا رسمي وإحنا أثبتنا الزواج ده في المحكمة.
قولت اشتغل زي اليوتيوبر وأجيب مصاريف نفسي
وأضافت أول صفحة عملتها في شهر نوفمبر لسنة 2021، والفكرة جاتلي لما فتحت اليوتيوب وشوفت اللي بيعملوا اليوميات، فأنا قولت اشتغل وأعمل زيهم وأجيب مصاريف لأن القنوات ديه بتكسب فلوس، لأن أنا كنت بشوف إن أصحاب القنوات دول بعد فترة بيغيروا شقق وبيغيروا ملابس وبيبان على شكلهم إنهم كسبوا فلوس من خلال المشاهدات.
كنت عايزة حاجة تشغلني بعد وفاة بنتي
وتابعت: اخترت اليوميات وأسرار مطبخ بس كان عندي تحفظ على اليوميات، لأن الستات فيها كانت بتطلع بشكل شبه عريانة، فأنا قولت اشتغل في اليوميات بحرص لأنها بتجيب مشاهدات أكثر من قنوات الطبخ، وأن أنا أكون واخدة بالي من لبسي وما أبينش أجزاء من جسمي، فأنشأت 3 صفحات على اليوتيوب، وأول صفحة اسمها عالم نشوى، وأنا اللي قمت بإدارتها في شهر 11 لسنة 2021، وأنا كنت فيها بطبخ أكلات عادية، وأنشأت الصفحة ديه عشان أزود دخلي لأني قاعدة في البيت وكنت عايزة حاجة تشغلني بعد وفاة بنتي.
صفحة الطبخ مجبتش فلوس فقررت أعمل الروتين وأبيّن جسمي
وأكملت نبوية أنوش في اعترافاتها أمام جهات التحقيق: لكن صفحة الطبخ مجابلتيش فلوس، عشان مكنش عليها مشاهدات، ومكنش فيه حد بيشاهدني وكنت بحاول أزود مشاهدتها بس معرفتش، فعملت حسابين واحد يوتيوب وواحد تيك توك بنفس اسم الصفحة عشان الناس تفتكر إن أنا مشهورة وأخش أزود المشاهدات، وقولت هعمل الروتين اليومي وأحاول أبين جسمي عشان أجيب مشاهدات وده اللي حصل.