مصطلحات الساحل الشمالي 2023 يبحث عنها كثير من المصطافين ممن قرروا قضاء الإجازة الصيفية للتأقلم مع التطورات السنوية لزوار تلك المنطقة التي اعتادت تغيير الكثير من المصطلحات المتداولة وتعريفها باللغة الإنجليزية.
مصطلحات الساحل الشمالي 2023
مصطلحات الساحل الشمالي 2023 كشف عنها الإعلامي والكاتب والممثل أحمد سالم عبر الصفحة الرسمية له على موقع التواصل الاجتماعي فيسبوك تحت عنوان دليلك الخطير لزيارة الساحل الشرير.
وأكد سالم في منشور ساخر:” بص يا سيدي من أولها كدة كلمة قرية دي تقولها لو رايح قرية أعضاء هيئة تدريس معهد سيكلام لكن من بعد العلمين كل مكان له اسم دلع معروف زي ديبلو و ستلا و حنيش”.
وأضاف :” كلمة كارنيه تقولها لو داخل مركز شباب الحبانية عشان اسمه بقي باس او كيو ار كود علي موبايلك و ده لازم واحد صاحبك من أهل الساحل هو اللي يبعتهولك ، وصاحبك ده لازم تحسن علاقتك به قبل الصيف بكام شهر عشان مايفهمش انك مصلحجي”.
وأوضح أن:” قهوة تركي او فرنساوي او مانو دي بتاعة قهوة فاروق أو القهوة العالية بتاعة محطة مصر إنما هنا لازم تقول كوفي و انسي ان حد يساعدك في الطلبات ويغششك زي ستاربكس و تفضل تقول اه اه و انت مش فاهم حاجة و هو فاهم انك مش فاهم “.
وأشار إلى أنه لابد من الاعتماد على النفس قائلا :”لازم تعتمد علي نفسك و تحفظ اسم اي قهوة ثلاثي، فلات وايت كراميل او كابتشينو سكيمد سمول غير كدة هتقف في نص هدومك قدام الباريستا( القهوجي).
وأكمل :”لو بتحب الآيس كريم انسي جو الفانيليا و الشيكولاتة و الفراولة وإلا روح كل عند عزة او الصعيدي، في الساحل لازم تستر نفسك بإسمين لأي نوع كرملايزد الموند او سولتد كراميل و لازم تقول فانيللا مش فانيليا عشان يرضوا يدخلوك داراز او كولد ستون”.
وأضاف :”لو هتاكل سوشي متحاولش تفهم المنيو عشان الصيف هيخلص و انت لسة في اول صفحة، هتلاقي واحد صاحبك معاك عالترابيزة قديم في السوشي قل له انك بتحب السلمون و الكابوريا و هو هيتصرف”.
ونصح الاعلامي الشهير متابعيه قائلا :”مفيش حاجة هنا اسمها زلابية او صوابع زينب عشان زينب نفسها مستحيل يدخلوها، أسأل في الخباثة و هتلاقي واحدة مكانها اسمها ريتشويلز او بوبس او اي حاجة غير زينب”.
ومن بين مصطلحات الساحل الجديدة 2023 التي أشار إليها الإعلامي في منشوره :
- فستان دي تقولها لو شاريه من ميامي ب٢٠٠ جنيه إنما هنا هو بالظبط بس اسمه دريس و ب٥٠٠٠ جنيه من الامبوريوم بتاع مراسي.
- البنطلون هنا سويت بانتس او كارجو بانتس او جوجر
- الشبشب سلايد او فليب فلوب
- المكنة باجي
- الاسكوتر جلايد
- البيسين بوول
- البحيرة ليك أو لاجون
- الكابينة كبانا.
وحذر سالم متابعيه من الخروج للشاطئ بالزي التقليدي قائلا :” أوعي تطلع عالبحر بالكوتشي و الشراب علي شورت و تيشيرت عشان هتبقي دسوقي افندي عالبلاج، لازم تلبس حاجتين ملهمش اي علاقة ببعض زي المايوه علي القميص الكتان اللي كنت بتخرج به في العيد و يا سلام لو قميص مقلم زي جاكيت البيجامة الكستور بتاع زمان ، المشكلة بالنسبة للستات عدت موضوع البكيني و البوركيني و بقت الست لازم تروح للكوافير قبل البحر و تتشيك و تلبس شبكتها كأنها رايح فرح بنت خالتها”.
اقرأ أيضا:
جوري بكر في مقطع فيديو من الساحل الشمالي: فيه قلة أدب بتحصل
العثور على جثمان غريق الساحل الشمالي.. والبحث جار عن شاب آخر
ووجه رسالة لمن يريدون السهر في الساحل:” لو عايز تسهر في مكان حلو لازم تظبط بروفايل الفايسبوك بتاعك عشان لو صفحتك اسمها طائر الليل الحزين او حبيبة جوزي و مامة بسملة و رنيم ،هيحرجوك جامد حتي لو معاك ملايين الدنيا “.