"أبويا كان بيتكلم 6 لغات".. أبرز تصريحات أحمد السقا في بيت السعد
كشف الفنان أحمد السقا عن سر حرصه على التواجد والمشاركة بشكل كبير في المواقف الصعبة وكل عزاء ودفنة، وعدم تواجده بنفس الشكل في المناسبات السعيدة كحفلات الزفاف وأعياد الميلاد الميلاد.
وأوضح أحمد السقا، خلال حلوله ضيفًا مع الفنان عمرو سعد وشقيقه المطرب أحمد سعد بحلقة الأمس من برنامج "بيت السعد" المذاع عبر قناة mbc، أنه لا يستطيع أن يجد أحدًا من أحبائه في شدة ولا يقف إلا جواره.
ويستعرض الأيام المصرية في السطور التالية التصريحات التي جاءت على لسان أحمد السقا في برنامج "بيت السعد".
فعن تواجده في كل عزاء ودفنه، أكثر من حضوره لحفلات الزفاف واعياد الميلاد قال السقا: "أنا مايفرقش معايا مع صاحبي"، مستدركًا: "ربنا ما يحوج حد ليا في أي حاجة وحشة"، وتابع: "مايفرقش معايا إني ممكن ماجيلكش فرح، ماجيلكش عيد ميلاد وأعتذرلك".
ولفت: "بس والله طبعي كده، مش ادعاء وربنا أعلم ومطلع على القلوب، أنا لو حد حبيبي في شدة ماقدرش أبقى مش جانبه".
أحمد السقا لـ أحمد سعد: "في يوم الأيام هتحتاج للناس زي ما الناس بتحتاجلك"
ليعلق أحمد سعد موضحًا أن لديه مشكلةً بخصوص أداء الواجب تجاه أحد، حيث قال: "وأنا كمان والله العظيم ماقدرش أبقى جنبه، أنا عايز أقولك إني بجد بجد عندي مشكلة في موضوع ده".
وأردف سعد: "عندي مشكلة في إني أعمل الحاجات اللي ليها علاقة بالواجبات، أو إني أكون موجود في عزا"، ليرد السقا: "لازم تتخلص منها، والله لازم تتخلص منها أقسم بالله".
وأشار السقا: "لأنك في يوم من الأيام، وربنا ما يحوجك برضو لحد، هيتردلك واجبات وهيتردلك حاجات، في يوم من الأيام هتحتاج للناس زي ما الناس بتحتاجلك، ما إحنا ربنا خالقنا لبعضينا".
وتطرق السقا بالحديث عن أول صفعة تلقاها من والده المخرج الراحل صلاح السقا في حياته، مشيرًا إلى أنه حزن بشدة لأن والده كان صديقه جدًا له.
أحمد السقا: "شديت مع والدتي وقلتلها اللي هيجي ناحيتي هرمي نفسي من الشباك"
وبشأن ذلك روى السقا تفاصيل الموقف، الذي دفع والده لصفعه، وقال: "شديت مع والدتي شوية وقلتلها ماتكلمنيش كده، وإحنا في الدور الخامس وتحتينا أرض فاضية فيها خوابير حديد".
وأضاف أنه ذهب للشباك وهدد والدته بالانتحار قائلًا: "فقمت طالع على الشباك وقلتلها اللي هيجي ناحيتي هرمي نفسي من هنا"، لافتًا: "كنت في تانية معهد مثلًا، كنت كبير مش صغير 18 سنة مثلًا".
أحمد السقا: "أبويا كان بيتكلم 6 لغات زي أهل البلد"
وأكمل: "فلقيت أمي بتنده أبويا"، موضحًا: "أبويا وأمي كانوا بيتكلموا فرنساوي لما مايحبونيش أفهم حاجة"، منوهًا: "أبويا كان بيتكلم 6 لغات وأمي بتتكلم فرنساوي"، مشددًا: "ست لغات والله، إنجليزي، فرنساوي، طلياني، روسي، بلوندي، روماني زي أهل البلد".
وواصل السقا: "المهم فاتكلموا كلمتين فرنساوي ندهتله يا صلاح مش عارف إيه، وأنا واقف عز الدين أيبك، فراح بصلي بابا الله يرحمه قالي نط، قلتله إيه؟، قالي نط، أنت مش قلت هتنط، هعتبر إني ماخلفتش غير أختك نط يلا".
أحمد السقا: "أبويا كانت إيده تقيله وعندي ودن سمعي تقل"
واستكمل: "وأنا وأبويا كنا صحاب جدًا الله يرحمه، قالي نط أنت مش بتقول أنط، نط"، واصفًا والده بأنه كان إدارجيًا وحكيمًا جدًا، حيث قال: "أبويا كان معلم وإدارجي مش قادر أقولك الله يرحمه، وحكيم حكيم يعني".
ثم أضاف: "فضل يقرب مني يقرب مني يقرب مني يقرب مني، لحد ما شدني من كمر البنطلون وقلم قلم"، لافتًا: "أنا عندي ودن لحد دلوقتي سمعي تقل، أبويا كان بيلعب ملاكمة وهو صغير، إيده تقيلة الله يرحمه".
وأتم أحمد السقا: "فبصيت كده زعلت جدًا، أبويا كان صاحبي جدًا الله يرحمه، بعديها بكام يوم قاعد في الأوضة مكتئب جدًا، مش مصدق أصلًا، واقعة يعني، لقيت أبويا داخل عليا، قالي أنا ماضربتكش عشان زعقت مع ماما، أنا عارف إنك متربي، أنا ضربتك علشان قلت هتنط ومانطتش".
آخر أعمال أحمد السقا
يشار إلى أن آخر أعمال الفنان أحمد السقا فيلم "السرب"، الذي تم عرضه بالسينما في مايو الماضي، وشاركه في بطولته مصطفى فهمي، شريف منير، دياب، محمد ممدوح، محمود عبد المغني، نيللي كريم، صبا مبارك وغيرهم، وهو من تأليف عمر عبد الحليم وإخراج أحمد نادر جلال.
مواعيد بيت السعد
ويذكر أن برنامج "بيت السعد" يذاع الأربعاء من كل أسبوع عبر قناة mbc في تمام الـ11 مساءً بتوقيت القاهرة والسعودية، وهو من تقديم الفنان عمرو سعد والمطرب أحمد سعد.
