إسلام خليل لـ رضا البحراوي: المفروض تصرفاتك تكون على قدر نجوميتك
انتقد الشاعر إسلام خليل الفنان رضا البحراوي لغنائه أغانٍ ليست له في المناسبات، معتبرًا ذلك تعديًا على حقوق الملكية الفكرية.
كما أكد إسلام خليل على ضرورة أن يقوم رضا البحراوي بإنتاج أعماله الخاصة، مشيرًا إلى أن الاستحواذ على أغانٍ ليست من حقه يعد قطعًا لمصدر رزق بعض المطربين.
ومن جانبه شارك "خليل متابعيه مقطع فيديو عبر حسابه الشخصي على تيك توك، قال: “يا رضا، في حاجة اسمها حقوق الملكية الفكرية، الكلمة زي الفلوس والذهب”.
وتابع: “لما تتاخد بدون وجه حق، فدي تعتبر سرقة، أنت المفروض دلوقتي بقيت نجم، وبقى ليك اسم، الواحد كل ما بينجح كل ما بيبدأ يغير أسلوبه في الحياة أخلاقيًا، والمفروض تصرفاتك تكون على قدر النجومية اللي وصلت لها”.
إسلام خليل لـ رضا البحراوي: محتاج أغنية أطلبها مني وهكتبهالك هدية
وأضاف إسلام خليل معاتبًا رضا البحراوي: “يعني أكون كاتب أغنية لحد وأنت تغنيها بدون وجه حق، الحل سهل لو محتاج أغنية، اطلبها مني وأنا هكتبهالك هدية، لو مش عايز تدفع حقها”.
واستكمل: “أنا غني عن التعريف بأعمالي الكثيرة وتاريخي الطويل مع الفنان شعبان عبد الرحيم، وكل ألحان شعبان عبد الرحيم مسجلة باسمي في جمعية المؤلفين والملحنين”.
وأردف: “ولا أنت حابب الناس ترفع عليك قضية، أنا عارف إنك لسه دافع مبلغ بسبب لحن قديم، وابنه أخد منك فلوس، ولو أنت شايف أنك نجم وتعرف تقف قدام أي حد وتتكلم فأحنا بردو زيك ولينا معارف وعلاقات ونعرف نجيب حقنا”.
وأكد إسلام خليل حديثه على أسباب غضبه، قائلًا: "إذا كان عدوية عبد الرحيم زعلان لأنك غنّيت أغنيته إللي تعب فيها وسجلها، وعايز الأغنية تتعرف علشان يقدر يشتغل، فإزاي تستحوذ على أغنية مش ملكك كأنك بتقطع عيش الناس، ده ماينفعش، المفروض تساعد طالما أصبحت نجم، أنا مستني منك ردّ تقول فيه إنك مش هتعمل كده تاني، لأن حتى الأغاني اللي أتعرفت بيها مش بتاعتك، أعمل لنفسك تاريخ وسجل أغاني خاصة بيك، يبقى عندك رصيد، بدل ما تعيش على أغاني الآخرين".
واختتم إسلام خليل: "أنا اسمي إسلام خليل الشاعر عشان لو أنت مش عارف الاسم، ودي تبقى حاجة وحشة جدًا لو أنت متعرفش الاسماء الكبيرة إللي في المجال إللي أنت بتشتغل فيه".
وتحرص الأيام المصرية على موافاتكم بآخر وأهم الأخبار الفنية على مدار الساعة.
