"الوحش" يتقدم ببلاغ ضد إيناس الدغيدي بسبب إباحتها المعاشرة الزوجية خلال الخطوبة

كشف المحامي بالنقض نبيه الوحش، عن تفاصيل تقديمه بلاغ ضد المخرجة إيناس الدغيدي، بعد تصريحاتها التي قلبت صفحات السوشيال ميديا ومواقع التواصل الاجتماعي.

نبيه الوحش يتقدم ببلاغ ضد إيناس الدغيدي

قال “الوحش” في تصريحات خاصة لـ الأيام المصرية، إنه سيتقدم ببلاغ رسمي ضد المخرجة إيناس الدغيدي بعد تصريحاتها الأخيرة عن المساكنة قبل الزواج وفي فترة الخطوبة.

وأضاف: "هتقدم ببلاغ رسمي في السيد وزير الداخلية ومكاتب الرصد عنده، علشان سايب الأستاذة دي بتدعو للفسق والفجور، وهو شريك معاها في التحريض على الفسق والفجور، الناس اللي فوق مهملة، وأنا الحمد لله مبخفش من حد".

وتابع: “إيناس الدغيدي دي مش العيب فيها، العيب في المسؤولين اللي سايبينها، طالما مفيش رادع هيفضلوا كده، فيه قانون عندنا بيقول من آمن العقاب أساء الأدب، لأن الاجهزة الرقابية عندنا نايمة في العسل، هما عارفين ونايمين وراضيين على المهاترات اللي بتحصل من الشخصيات العامة دي، يبقى هما مسؤولين قدامنا احنا كشعب”.

رد نبيه الوحش على تصريحات إيناس الدغيدي

أشار نبيه الوحش المحامي بالنقض، في تصريحاته الخاصة لـ الأيام المصرية، إلى أن المذنب والمخطئ المتسبب في تصريحات إيناس الدغيدي، هم المسؤولين.

وقال “الوحش: “أنا بعيب على المسؤولين المصريين، بدءً من وزير الداخلية اللي عنده مكاتب رصد، والنائب العام اللي عنده مكاتب رصد على تصريحات إيناس الدغيدي التي فاقت الحدود، أولا هي منذ تصريحاتها بتحرض على الفسق والفجور وتحرض على الزنا وارتكبت كل الجرائم المخالفة لقانون العقوبات، إزاي سايبينها لغاية دلوقتي؟”.

وتابع "الوحش": “أنا  في 2002 حاصل على حكم بجلد إيناس الدغيدي، عندما أخطأت وصرحت وأهانت بنات مصر الفضليات، الطاهرات، العفيفات، وقالت إنه بنات مصر بقوا ثيبات، مفيهومش بنات أفكار في فيلم مذكرات مراهقة”.

وأردف: "إيناس دي مش العيب فيها، العيب في المسؤولين، اللي مش واخدين ضدها إجراء قانوني، مين إيناس الدغيدي دي اللي فوق القانون، دي المفروض يتخذ ضدها اجراءات قانونية رادعة وحاسمة".

نبيه الوحش يهاج أشرف زكي نقيب المهن التمثيلية

كما هاجم نبيه الوحش المحامي بالنقض نقيب المهن التمثيلية أشرف زكي، لعدم تحركه ضد المخرجة إيناس الدغيدي بعد تصريحاتها الأخيرة عن المساكنة قبل الزواج.

وقال “الوحش”: "المفروض أشرف زكي نقيب المهن التمثيلية المشخصاتية، والراجل التاني نقيب نقابة المؤلفين والمنتجين، يفصلوها من النقابات دي، مين دي؟".

واستكمل: “دي بتدعو لهدم الثوابت الإسلامية وبتفكيك الأسر المصرية يعني مفيش حسنة، وهي قالت أنا ما فيش حد للحرام عندي، هي صرحت بده، والاعتراف سيد الأدلة، يعني هي معترفة إن هي فاسقة وفاجرة بالحكم اللي خدناه بالجلد وصفها بكده”.

تصريحات إيناس الدغيدي اعتراف بالدعارة

يستكمل نبيه الوحش تصريحاته الخاصة لـ الأيام المصرية، وقال إن ما صرحت به إيناس الدغيدي، ما هو إلا اعتراف صريح وواضح بارتكاب جريمة الدعارة، وهو ما يخالف عادات مجتمعنا الإسلامي.

وتابع: “إحنا دولة إسلامية مرتبطين بالدستور المصري اللي نص في المادة الأولى على انه احنا دولة إسلامية، المادة 2 بتقول الشريعة الإسلامية هي المصدر الرئيسي للتشريع، أنا قلت 100 مرة مش عاجبك العيشة في مصر ومش عاجبك ثوابتها الإسلامية، ومش عاجبك قوانينها، في ال60 داية، عيشي برا وانفتحي زي ما انتي عايزه، يعني تصريح من ضمن التصريحات بتقولك أنا قعدت 9 سنين مساكنة مع جوزي قبل الجواز، ده، دعارة، فين المسؤولين من التصريحات دي؟”. 

تصريحات إيناس الدغيدي تسيء للمصريين بالوطن العربي

أكد المحامي بالنقض نبيه الوحش، في تصريحاته لـ الأيام المصرية، أن ما يصدر من إيناس الدغيدي وغيرها من المشاهير والشخصيات العامة، يسيء للمجتمع المصري.

وتابع الوحش: طب أنتو عايزين أكتر من كده إيه؟ مسؤولين إيه إللي واخدين لترامادول لبوس دول؟ دي حاجة تجنن، دي عايزه يتولع فيها بنزين وسخ، دي بتدي صورة سيئة عن مصر، الدول العربية بتعايرنا بالمشخصاتية وبإيناس وبالأشكال والوسخة دي.

احترام قوانين البلاد واجب

اكمل نبيه الوحش تصريحه لموقع الأيام المصرية، بأن احترام قوانين البلاد واجب، ولا بد من إلتزام كافة الأفراد بقوانين أي بلد فيها، وهذا ما لم تفعله إيناس الدغيدي.

قائلا:  أنا لو عايش في أمريكا بلتزم بقوانين أمريكا، أنا عايش في مصر بلتزم بالقانون المصري، عايزة تقول الكلام ده تاخد نفسها كده وتروح تشتغل في تركيا، أهي تركيا مرخصة بيوت الدعارة، وحتى الإمارات مرخصة بيوت الدعارة، إنما متجيش لدولة إسلامية محترمة وناسها محترمين، وثوابت إسلامية، وحتى مسيحية محترمة، وتيجي تنشر الفسق والفجور.

وتابع: المسؤولين عن محاسبتها، الدولة ووزير الداخلية اللي عنده مكاتب رصد، قبل كده قدموا إسلام بحيري بتهمة ازدراء الأديان، وإبراهيم عيسى برضه، مين بقى إيناس الدغيدي؟ وفوق القانون ليه؟

لا يفوتك

رد صادم من أحمد كريمة على «مساكنة إيناس الدغيدي» قبل الزواج (خاص)

إيناس الدغيدي: سيبوا عادل إمام يعيش اللي باقي من حياته في سلام