إيناس كامل: فقدت الأمل في عرض "التاريخ السري لكوثر" مع ليلى علوي (خاص)
كشفت الفنانة إيناس كامل أنها فقدت الأمل في عرض فيلم “التاريخ السري لكوثر”، الذي شاركت في بطولته مع الفنانة ليلى علوي ومن إخراج محمد أمين، موضحةً أنه فيلم سياسي رهيب.
كما تحدثت إيناس كامل عن دورها المميز في مسلسل “بين فرح” مع الفنان فتحي عبد الوهاب ومن إخراج شيرين عادل، وكذلك دورها المميز في فيلم "يوم 13" مع مجموعة كبيرة من الفنانين ومن إخراج وائل عبد الله.
ويستعرض الأيام المصرية في السطور التالية تصريحات إيناس كامل عن فيلم “التاريخ السري لكوثر”، مسلسل “بيت فرح” وفيلم “يوم 13”.
"استقتلت علشان دوري فيه".. إيناس كامل تتحدث عن دورها في بيت فرح
بشأن دورها في "بيت فرح" أوضحت إيناس أنها قامت بالاستقتال من أجل القيام بهذا الدور قائلةً: "أنا استقتلت علشان أعمل الدور ده، الدور ده كان من أكتر الأدوار اللي فرحت بيها لما اتعرضت عليا".
موضحةً أنها لا يفرق معها حجم الدور حيث قالت: "أنا مابيفرقش معايا الدور كبير ولا صغير خالص، أنا المهم عندي هو الدور مهم ولا لأ".
وأضافت: "فأنا بالنسبة لي لما جالي الورق هو المسلسل من غير الشخصية من غير الطيف اللي بييجي لـ فرح مافيش مسلسل أو على الأقل الخط بتاعه، فيه ممكن بقية العمارة بقية مشاكلها بس".
مشيرة: "خط البطل الأساسي اللي عايش في الخيال وباعد نفسه وواحد نفسه مابيتعاملش مع حد وعايش مع الخيال في دماغه بس، هو خط الدراما بتاع المسلسل كله".
وأكملت إيناس: "فأنا كنت مسافرة وقت ما جالي المسلسل وكانوا عايزين يبدأوا على طول، وكلموني وأنا كنت بره وكان مش هينفع أرجع غير في وقت معين، واتفقات مع شركة الإنتاج وكان فيه اعتذارات رايحة جاية".
لافتةً إلى تمسك المخرجة شيرين عادل بها في الدور حيث قالت: "أستاذة شيرين عادل حبيبة قلبي تمسكت بيا جدًا في الدور".
وأردفت: "وأنا كنت مسافرة، وأنا عمري ما أقطع سفرية علشان شغل خالص"، وأشارت ضاحكةً: "أنا ممكن أعتذر عن شغل علشان أسافر مش العكس"، متابعة ً: "قطعت السفر ورجعت من كتر ما أنا كنت حابة الدور ده أوي".
وعن نظرتها للشخصية قالت إيناس: "باصلها بإن عارف لما يبقى حد شخصية جميلة وماتت بدري، بصيتلها كأنها واحدة بنت موت".
لتوضح: "عارف لما بنقول على حد ابن موت أو بنت موت، اللي هي دايمًا بتبقى شخصيات بشوشة، دايمًا شخصيات مريحة، دايما بيبقوا شخصيات ابتسامتهم موجودة على وشهم، هي دي الخطوط العريضة أو المبدئية اللي رسمت بيها الشخصية في دماغي".
مضيفةً: "إلى جانب إن المشاهد بينها وبين فرح كانت مكتوبة حلو أوي والإحساس بتاعها سهل إنه يوصل، فأنا كنت مبسوطة مبسوطة بكل الشخصية وإنها حاجة جديدة".
وتابعت: "أنا عمري ما عملت روح واحدة ميتة قبل كده، فالموضوع كله بالنسبالي على بعضه جديد ولطيف وخفيف وماتعملش عندنا هنا في حاجة، فكنت مبسوطة أوي بالتجربة دي".
"كان سابق في حاجات كتير".. إيناس كامل تكشف عن أسرار مشاركتها في يوم 13
أما عن "يوم 13" الذي يعد فيلم رعب، لكنه فيلم رعب مقدم بشكل جيد، وليس فيلم يمكن أن يؤخذ بشكل كوميدي، فأوضحت أن هذا ما حمسها لهذا افيلم قائلةً: "دي الحاجة اللي حمستني للفيلم".
موضحةً أنها تعتذر عن الكثير من الأفلام بسبب عدم ثقتها في جهة الإنتاج أو الإخراج، قائلةً: "أنا بعتذر عن أفلام كتيرة أوي بتجي لي، فيه منهم أفلام كتيرة أوي ببقى علشان مش واثقة من جهة الإنتاج أو جهة الإخراج".
ولفتت إلى أنه كانت تعرض عليها الكثير من أفلام الرعب"كان فيه أفلام رعب بتجيلي كنت بعتذر أقولهم لا أنا مش هحط نفسي في الهبل ده، رعب إيه ومش رعب إيه؟".
لتكشف إيناس عن أن هذا الفيلم كان من الممكن أن يكون سبّاقًا في أشياء كثيرةً، لولا عدم عرضه في الوقت الذي كان مقررًا له بسب الكورنا.
إذ أوضحت: "لما جالي ده، وخصوصًا إن الفيلم ده بدأناه في 2019، يعني إحنا خلصنا الفيلم ده في فبراير 2020، اللي هو بعدها بأسبوعين حصلت الكورونا من بدايتها".
لتلفت أن ذلك وهو ما يمكن أن يكون قد أثر وقت عرض الفيلم، قائلةً: "فهو ده يمكن اللي أثر على وقت عرض الفيلم، الفيلم ده لو كان اتعرض وقت ما المفروض يتعرض كان هيبقى سابق حاجات كتيرة أوي".
وحول أسباب أن "يوم 13" كان فيلمًا سبّاقًا في أشياء كثيرة، أوضحت إيناس: "لأنه كان أول فيلم 3d في مصر، أول فيلم رعب حقيقي في مصر من أيام الإنس والجن، وتقريبًا ماكنش فيه إحنا أول حد يدخل في نوعية الرعب دي".
"أنا حزينة على الفيلم ده".. إيناس كامل تعرب عن حزنها لعدم عرض التاريخ السري لكوثر حتى الآن
وبخصوص "التاريخ السري لكوثر" أوضحت أنها فقد الأمل في عرض هذا الفيلم قائلةً: "ده أنا فقدت الأمل فيه خلاص"، ولفتت: "كل شوية أسمع ده خلاص نازل، والله مش عارفة المشكلة إيه رقابيًا المشكلة إيه ماعرفش".
لتقوم بتوضيح قصدها بـ"رقابيًا" قائلةً: "رقابيًا أقصد إنه فيلم جريء فكريًا، لأنه فيلم سياسي رهيب"، معربةً عن حزنها لعدم عرض الفيلم حتى الآن قائلةً: "أنا حزينة على الفيلم ده من كتر هو أد إيه فيلم خطير مش عادي".
وبخصوص مخرج "التاريخ السري لكوثر" محمد أمين، قالت: "والراجل ده بصراحة وخصوصًا دماغه في الكتابة، يعني في الكتابة رهيب".
ولفتت إلى أنها كانت تطلب من المخرج بتقديم مزيدًا من الأعمال قائلةً: "حتى أنا كنت بقعد أقوله لو سمحت أعمل حاجات أكتر من كده، محتاجين أعمال من عندك، قالي قوليهم هما اللي بيشاكلوا فيه وقد يضحك".
وأتمت الفنانة إيناس كامل مؤكدةً أنها فقدت الأمل في عرض "التاريخ السري لكوثر" حيث قالت: "فأنا فقدت الأمل في الفيلم ده خلاص يعني مش عارفة".