محمد صبحي: "تصنيف العمل ينبع من كيفية كتابة النص نفسه"

الخميس 08/أغسطس/2024 - 03:00 ص

قال الفنان محمد صبحي، إن تصنيف العمل ينبع من كيفية كتابة النص نفسه، وثانيًا أن يكون النص به رسالة.

وأضاف “صبحي” في الماستر كلاس ضمن فعاليات المهرجان القومي للمسرح المصري في دورته الـ17 "دورة سيدة المسرح العربي سميحة أيوب"، بحضور عدد كبير من الفنانين، أن هذه الرسالة عندما تكون سياسيةً، فليس شرطًا أن يكون مسرحًا سياسيًا.

تحدث الفنان الكبير عن فكرة مسرح الريبرتوار وأهميته الكبيرة، كاشفًا معاناته في هذا الأمر عندما يتحدث مع أسرة المؤلفين الراحلين في أنه يريد الحصول على نص للمؤلف وتقديمه على المسرح.

ويرصد الأيام المصرية في السطور التالية أبرز تصريحات محمد صبحي، التي جاءت على لسانه خلال الماستر كلاس.

وقال صبحي: "أنا مش عايز أتكلم عن أعمالي كتير، بس أنا عايز أقول إن تصنيف العمل ده جاي من النص نفسه مكتوب إزاي، ده واحد، نمرة 2 فيه رسالة، الرسالة دي لما بتبقى سياسية مش شرط يبقى مسرح سياسي".

محمد صبحي: "ماما أمريكا والزيارة مسرح سياسي"

وأوضح: "ماما أمريكا مسرح سياسي، الزيارة لـ دورينمات، لما عملتها لـ سناء جميل وجميل راتب مخرجًا بس، مسرح سياسي".

وتطرق صبحي بالحديث عن فكرة الريبرتوار ومعاناته مع أسرة المؤلفين الراحلين لتقديم أعمالهم على المسرح قائلًا: "كارمن وسكة السلامة ولعبة الست كانت فكرة الريبرتوار".

محمد صبحي: "مستعد أشارك في الريبرتوار لو حد تبنى ماديًا بس نطلع المسرحيات"

وأشار: "مهم جدًا الريبرتوار، في مجتمعنا لو حد تبنى، وأنا مستعد أشارك في ده ماديًأ حتى، بس نطلع المسرحيات"، لافت: "أنا كان ليا تجربة مريرة، لما بكلم أهل المؤلف بيتجننوا".

تابع صبحي: "يعني أنا عايز أقدم مسرحية الأستاذ بتاعت سعد الدين وهبة، ولاده بيقولوا كلام"، موضحًا: "ما أنا عايز أقدمه علشان أكرمه".

وحول المؤلفين الذين يرغب في تقديم مسرحيات لهم أردف صبحي: "نفسي أقدم صلاح عبد الصبور، نفسي أقدم أعمال لـ عبد الرحمن الشرقاوي، أقدم الأعمال اللي اتقدمت لـ محمود دياب، لـ ميخائيل رومان ونعيم بسيسو، أعمال كتير أوي ورشاد رشدي، سعد الدين وهبة، نعمان عاشور".

واستكمل: "يعني قصدي إن لما أجيالنا النهاردة تشوف المسرح ده، صحيح اتقدم في الستينات، بس لأن العصر يتطور من حيث السينوغرافيا والتكنولوجيا، لا مانع".

محمد صبحي: "عشت في حرب شرسة لإلغاء تلفزة المسرح"

وأضاف: "وده اللي إحنا بنشوفه في أوروبا، لما بسافر أوروبا ولا أمريكا، يقولك في البامفلت المسرحية دي قدمت سنة 1932، ثم أعاد إخراجها المخرج الفلاني، ثم سنة 1955، بتتعمل بكذا شكل، بس الأجيال تتفرج عليها".

وأرجع “صبحي” السبب وراء إلى منع تلفزة الأعمال المسرحية بهذه الدول قائلًا: "بس ده ليه؟، عشان الدول دي فيها النقابات بتاعتها ممنوع تلفزة المسرح، وأنا عشت في حرب شرسة وصلت لمجلس الشعب أيام مبارك إني عايز ألغي تلفزة المسرح، رغم إني نجم وبيجيلي فلوس كتير جدًا من تصوير التليفزيون".

واستكمل: "لو اتلغى تصوير التليفزيون، أنت تصنع إبداعًا جديدًا لـ20 سنة قدام هيخدوها ويعملوها، النهاردة لو حد من إياهم خد الأعمال القديمة هيحولوها لتيك توك، تخيل بقى الفتى مهران ولا جميلة بوحريد تتعمل تيك توك، يعني للأسف".

محمد صبحي: "فيه فنانين كتير حتى من تلامذتي اتظلموا في هذا العصر"

وواصل محمد صبحي: "أنا مش عايز بس أكرر الكلام في ده، لأنه حقيقي سبب إن فيه فنانين كتير، حتى من تلامذتي اتظلموا في هذا العصر، اتكلموا لأنهم فنانين على أعلى مستوى وجواهم طاقات عظيمة، أنا بقولهم أنتو جيل جيتوا في وقت غلط، في وقت فيه الفن والثقافة للأسف".

وأتم الفنان محمد صبحي كلامه: "أنا عندي كلام يملا 100 ساعة، إنما باختصار شديد يا ريت بس كذا صوت يطلع، محتاجين نطبق مناهج فنية، نحترم نفسينا إننا نقدم مناهج فنية وبالتحديد في المسرح".