أول تعليق من فريدة سيف النصر على انضمام فيفي عبده في العتاولة 2 (خاص)
كشفت الفنانة فريدة سيف النصر عن حقيقة اعتذارها عن دورها في مسلسل العتاولة 2، المقرر أن يشارك في موسم دراما رمضان المقبل 2025.
ونوضح لكم في موقع الأيام المصرية أبرز تصريحات فريدة سيف النصر، عن حقيقة قصة خلافها مع مخرج مسلسل العتاولة، والذي أعلن انضماما فيفي عبده لمسلسل العتاولة 2.
حقيقة اعتذار فريدة سيف النصر عن مسلسل العتاولة 2
قالت فريدة سيف النصر في تصريحات خاصة لموقع الأيام المصرية، أنه لم يحدث أي خلاف بينها وبين المخرج في الجزء الأول من مسلسل العتاولة، كما لم يحدث أي خلاف مع أيا من صناع العمل.
قائلة: المخرج قتلني في الحلقة الأخيرة من الجزء الأول، ومش هجري ورام وأقولهم ليه، ومحصلش بينا أي خلاف ولا حتى كلمة صباح الخير بطريقة وحشة، ولا حتى اعترضت على أي حاجة ولا قولت جملة اتشالت مني ليه".
وتابعت: معرفش فيفي عبده هتعمل دور ايه في مسلسل العتاولة، بس أنا طبيعتي لما ألاقي حد زميل هيعمل حاجة كويسة أقوله مبروك، وهي صديقة ووقفت معايا في فرح ابني وجات رقصت من غير فلوس، هما طبيعتهم مبيقولوش بس أنا مش كده، الإنسان العاقل المؤمن بربنا بيتعامل كده، مفيش حاجة دايمة، انتوا بتخانقوا على فيلم ايه ومسلسل ايه جاتكم خيبة على خيبتكم".
تصريحات فريدة نصر عن أداء فيفي عبده في العتاولة 2
كما أشارت فريدة سيف النصر، إلى أنها قدمت دورا حقق نجاحا كبيرا وأحبه الجمهور، ولن تؤدي أي فنانة أخرى الدور كما أدته فريدة سيف النصر.
قائلة: فيفي ست دمها خفيف بس طبعا المسلسل بمنتهى الغرور مش هيبقى زي ما أما كنت فيه، فيه فرق بين ممثل وبين مؤدي، هي كتر خيرها هي رقاصة، ده كويس أوي إنها بتعمل شغلها كده، إنما عشان تعملي مشاهد دراما وتعرفي تضحكي إزاي، وتعيطي الناس إزاي، دي الخبرة دي قضية تانية، التمثيل بتاعنا مش صوت عالي ورقص وعُري، لا التمثيل ده قضية تانية.
وتابعت فريدة سيف النصر: يعني أنا في دور سترة كنت تخينة ولابسه مقفل وعبايات، ومع ذلك الحمد لله نجحت، المفروض انتي بتعملي الشخصية مش الحاجات الهابطة اللي بعملوها دي".
كما اضافت: أنا عملت سترة بطريقتي وأكيد لو هي عملت سترة هتعملها بطريقتها والكلمة للمخرج في الآخر، وأحمد موسى مخرج دماغه كويسة جدا وأنا مفيش بيني وبينه أي خلاف وهو سبحان الله اللي حصل حصل أمر الله، وهو حر يمكن هو عايز يشتغل مع ناس تانية.