فريدة سيف النصر تهاجم صناع العتاولة: موتوني.. وجايبين فيفي عبده علشان تملى مكاني
هاجمت الفنانة فريدة سيف النصر، فريق عمل مسلسل العتاولة 2، بعد علمها بانضمام الفنانة فيفي عبده لأبطال العمل المقرر عرضه ضمن مسلسلات موسم دراما رمضان 2025.
أكدت الفنانة فريدة سيف النصر في تصريحات لموقع الأيام المصرية، أنها أحبت دور سترة العترة الذي قدمته ضمن أحداث مسلسل العتاولة1، والذي حقق نجاحا كبيرا في موسم دراما رمضان الماضي قائلة :"مكنتش متوقعة النجاح والحب الكبير اللي حصل".
وأضافت : "أنا حبيت سترة جدا، وكانت لايقه عليا جدا، حبيتها زي ما حبيت دوري في مسلسل بدون ذكر أسماء، وزي ما حبيت زينب العطار في الأب الروحي، وزي ما حبيت دور طاطا الضريرة في حواديت الشانزليزيه، زي ما حبيت الفتوة أبو أحمد، أنا مبعرفش أعمل حاجة غير لما أكون بحبها".
فريدة سيف النصر: أدواري بتنجح وربنا بيفاجأني بشغل حلو
أكدت فريدة سيف النصر أنها ليس لديها معارف في الوسط الني من المنتجين أو المخرجين لكنها تفاجأ بأن صناع الدراما يطلبونها في أدوار مميزة دون أي تدخل منها قائلة : “ربنا بيوفقني، وأدواري بتنجح، دايما ربنا بيفاجأني بشغل حلو، أنا لا أعرف مخرجين ولا منتجين ولا غيره، وربنا بيكتبلي الشغل من غير ما أطلبه، فجأة تلاقيهم بيكلموني ويطلبوني في شغل”.
وكشفت مفاجأة عن دور شخصية “سترة ” الذي قدمته في الجزء الأول من العمل قائلة :"دور سترة ده مكنش بتاعي، ده كان دور زميلة معتذرة معرفش السبب عشان الأجر أو حاجة تانية، بس لاقيتهم بيكلموني على الدور".
فريدة سيف النصر: فيفي عبده كان نفسها في “العتاولة” ولو لها نصيب هتكمل
وعن انضمام الفنانة فيفي عبده لأبطال العمل، قالت: هو نصيب.. فيفي عبده قبل كده كانت مصرحة إنها نفسها تبقى في العتاولة وربنا جبهالها، أيمن سليم مؤلف مسلسل الشانزلزيه هو من أخبرني بهذا الكلام .. بس قولتله لا هي فيفي عبده هتطلب تشتغل في حاجة".
وأضافت: “حد فينا ضامن إنها ممكن تصور وتعيش لحد ما تصور المسلسل، بس فيفي عبده مكنش عينها على دوري، هي عندها فلوس وبتنتج.. ربنا يكرمها دي كانت عيانة ربنا يشفيها.. ليها نصيب هتكمل ملهاش نصيب مش هتكمل".
وأكملت :" فيه ناس لما تلاقي عمل ناجح تقولك أنا كان نفسي أبقى فيه، لأن العمل عاجبها، مثلا أنا كان نفسي اشتغل في مسلسل الحشاشين لكريم عبد العزيز لكن مش عيني على دور حد".
فريدة سيف النصر: جايبن فيفي عبده علشان تملى مكاني
أكدت فريدة سيف النصر أنه لم يحدث أي خلاف بينها وبين المخرج، وأن دورها انتهى في الجزء الأول بموتها مضيفة: أنا مش فاهمة هو ايه اللي حصل، يعني لا زعقنا لبعض في التصوير ولا زعلان على حاجة في التصوير، بالعكس ده كان بيقف يصرخ في التصوير يقول شوفوا سترة عملت ايه".
وعبرت عن تعجبها من وجود فيفي عبده قائلة: جايبن فيفي عبده قالي يعني تملى مكاني، معرفش موتوني ليه في آخر حلقة، الإنسان بيستنى نجاحه علشان يطلب يعلي أجره أو يعمل شغل أعلى يبقى خطوة في مشوار، خلوني حتى نجاحي متهنتش بيه".
عن اعتذارها عن دورها في مسلسل العتاولة 2، قالت: محدش كلمني على الجزء التاني، أعتذر إزاي؟ وعلاقتي بالشركة المنتجة طيبة ولم يحدث خلاف أثناء التصوير لكن "إزاي هيجبني في الجزء التاني إذا كان هو موتني في الجزء الأول، والجمهور سألهم فين سترة وإزاي تموتوها كده ودورها مهم".
وأضافت: فيه ناس بتدور على الشكل، هو ممكن متخيل إن تركيبة فيفي عبدة قريبة من تركيبة فريدة، تنفع معلمة بنت بلد مالية مركزها، لكن فيه معلم مثلا زي أبو هشيمة الأب الكبير قاعد في السبتية مالي مركزه بتاع حديد محدش يقدر يقرب منه تقيل، وفيه معلم على نصبة خضار، ده له هيبة غير ده، وده له حضور وكلمة غير ده، واحنا اتفرجنا على شغلي وعلى شغلها على مدار السنين كلها، هي مش هتعمل سترة لكن هما بيدوروا على نفس التركيبة، لكن التركيبة دي لما تفتح بوقها هتقول إيه؟ فيه فرق".
نصيحة فريدة سيف النصر لفيفي عبده
وجهت فريدة سيف النصر من خلال موقع الأيام المصرية، نصيحة للفنانة فيفي عبده، بعد انضمامها لفريق عمل مسلسل العتاولة 2 المقرر عرضه في رمضان 2025.
قائلة: أرجو من فيفي عبده تسمع كلام المخرج، وتلتزم بكلامه لأن أحمد موسى بيفهم كويس، وهيبقوا زي الفل مع بعض وهتعمل حاجة عمرها ما عملتها، كان بيقولي ملاحظات مهمة، ودماغه حلوة رغم إنه صغير في السن لكن دماغه حلوة في الفن".
تابعت فريدة سيف النصر:" حسبي الله ونعم الوكيل في أي حد عمل بيني وبينهم مشاكل ومعرفش مين هما.. أكيد حد وقع بيننا، الحياة أقصر من إني أدور وأجادل وأعرفي مين عمل ايه من ورايا، ووقع بينا، أنت مش عايزيني شكرا لما أنت بقى تعرف غلطتك وتيجي تكلمني وتعتذر، هو أنا اللي جيت اتخانقت معاك وسيبتك ومشيت، لا محصلش، أنا قاعدة في آمان الله واللي حصل حصل خلاص، وأنا اللي يهمني علاقتي بالشركة، الشركة لحد النهارده بيسألوا عليا، أستاذ صادق الصباح بنفسه والمنتج الفني المحترم علي حسن حبيبي لحد النهارده بيسأل عليا وبسأل عليه، إذا الناس دي فاهمة بس خلاص هيعملوا ايه؟، الناس دي فيه تكتل كبير يبقى السقا ولطفي وزينة وجابوا كمان فيفي عبده، لو افترضنا الحبة دول مكنوش عايزينك هيبقى فيه كترة تغلب الشجاعة، ولو افترضنا إن هما مقالوش حاجة أو مغاروش من نجاحي والمخرج بس هو اللي بيفكر كده، فهو له مطلق الحرية، هو حر".
فريدة سيف النصر: بيتي متواضع وعايشة في شقة صغيرة.. وكلنا ممكن نخرج منها في لحظة
أكدت فريدة سيف النصر لموقع الأيام المصرية، أنها تعيش حالة مادية عادية متواضعة، ليست مثل باقي الفنانات والمشاهير، ممن يتزوجون من رجال أعمال ويعيشون في فلل وقصور.
قائلة: أنا الحمد لله على كل حال، بيتي متواضع عايشة في شقة عادية صغيرة وابني متجوز في الشقة اللي فوقي، عيشتنا زي الناس، كله كان دايما يقولي انتي جميلة وفنانين غيرك اتجوزوا رجال أعمال مش ناس عادية وعاشوا في قصور، كنت بقولهم أنتوا هبل ولا شكلكوا كده؟، ده بستمتعوا وقت لحظي وأنا لما يبقى معايا فلوس وعايزه مكان زي ده بروح أأجر وأقعد فيه شويه، لكن الحقيقة إن كل ده مش بتاعنا ولا حاجة، كلنا ممكن نخرج منها في لحظة".