محمد صبحي يروي ذكريات تأسيس "استديو الممثل" وأول فيلم سينمائي له
تحدث الفنان محمد صبحي، عن فرقة “استديو الممثل” وتفاصيل تأسيسها وأبرز نجومها، وذلك بالماستر كلاس الذي يقام على هامش فعاليات الدورة الـ 17 من المهرجان القومي للمسرح المصري.
محمد صبحي وتأسيس فرقة استديو الممثل
رصدت كاميرا موقع الأيام المصرية، تفاصيل تأسيس فرقة ستديو الممثل، والتي أسسها الفنان محمد صبحي، وذلك على هامش جلسة حوارية خاصة له، بفعاليات المهرجان القومي للمسرح المصري.
وقال “صبحي”، إنّه تم تأسيس “فرقة استديو الممثل، على غرار مسرح ستناسلافيسكي، على مدار 55 عاما، عملتها من تلامذتي وزمايلي وكان عددهم كبير بس كلهم فقرانين، أنا بقبض 17 جنيه ونص، والعيال معهاش فلوس أصلا، فلازم إحنا اللي نعمل المسرحية، فبدأنا بمسرحية هاملت سنة 71، وبعدها عملت أوديب ملكا وأنتيجون، وقدمنها كلها أمام وجهة المعهد على مسرح مفتوح 60 متر أو 70 متر وأعمدة وجو المعهد ده”.
وتابع: اللي كان بيتفرج على العروض فلاحين العمرانية، كنا في غيط مش زي النهارده، كنا في منفى، كنا نعمل العرض الفلاحة تيجي جري بالعيلة اللي في ايدها، وييجوا يقعدوا في الجنينة يتفرجوا على هاملت".
محمد صبحي وتجربة هاملت
تحدث محمد صبحي، عن فكرة عرض هاملت، وقال إن وزير الثقافة وقت عرض هاملت، كان الراحل يوسف السباعي، والذي أراد أن يحضر العرض.
واستكمل: “فاكر في تجربة هاملت إن وزير الثقافة المرحوم يوسف السباعي، وقتها كان عايز يتفرج على العروض اللي هاقدمها على مسرح سيد درويش، هاملت واوديب وروميو وجوليت، فهييجي يتفرج على إيه، أنا مش معايا فلوس والعيال معهاش فلوس ومرتبي كله 17 جنيه ونص، وكان أغنى واحد في العيال عندي هو خالد زكي، فكان يقولي عايز كام ريال يعني، فالريال ده كان ايه حاجة جامدة بالنسبة لنا”.
وأردف: "كنا بنلم من بعض علشان نجيب الكولونات اللي بنلبسها في العرض، وكنا في الوكالة بنتفرج على الحاجة ومش معانا فلوس، روحنا المسرح نجهز ونعمل بروفات، فلاقيت واحد داخل عليا المسرح اسمه ممدوح الليثي، فقولته نعم حضرتك عايز ايه، وبعدين لاقيته بيقولي امضي، استغربت، قولتله امضي على ايه حضرتك قالي امضي على فيلم مع سعاد حسني".
واختتم: "لاقيت يوسف السباعي بيقولي تعرف مين ممدوح الليثي، قولتله لا، قالي ابقى اسأل بس امضي الأول، قولتله امضي على ايه؟، قالي على فيلم الكرنك، قولتله طيب لما اقرا الأول، قالي تقرا ايه ده فيلم مع سعاد حسني، طيب اصلي بعمل مسرحية هاملت، قالي هاملت ايه سيبك من الكلام الفارغ ده، بقولك فيلم مع سعاد حسني".
