محمد صبحي: "أزمتي مع المتحدة خلصت.. واعتذرت عن منصب الوزير بأدب"
أقيم ماستر كلاس للفنان الكبير محمد صبحي، اليوم الأربعاء، ضمن فعاليات المهرجان القومي للمسرح المصري في دورته الثانية، دورة سيدة المسرح العربي سميحة أيوب.
وكشف محمد صبحي خلال الماستر كلاس، انتهاء الأزمة التي نشبت مؤخرًا بينه وبين الشركة المتحدة للخدمات الإعلامية.
واستعرضت كاميرا الأيام المصرية، بتصوير المراسلة ميار الوصيف، في السطور التالية ما قاله صبحي عن أزمته مع المتحدة.
ردًا على سؤال أحد حضور الماستر كلاس، حول الأزمة بينه وبين المتحدة، قال “صبحي” بخفة ظله المعهودة: "اتصالحنا، اتصالحنا.. بدليل إنك جيت هنا".
محمد صبحي: "لما اتعرض عليا منصب وزير الثقافة أول مرة قعدت أضحك"
كما كشف صبحي سر رفضه لمنصب وزارة الثقافة، قائلًا: "لما اتعرض عليا أول مرة قعدت أضحك، قلت هما الناس دول بجد، كان في 2013 أيام عصام شرف ووزارة كمال الجنزوري، فأنا كنت بعتذر بأدب، لأ مش عايز".
وأضاف: "لما جه المهندس إبراهيم محلب، كان صديق ليا أوي، ولقيته بيجيلي يتفرج على العشوائيات وإزاي بعمل المدينة بتاعت العشوائيات، أول مشروع عشوائيات في مصر، عشان ينقذ أهالينا في العشوائيات، مشروع ضخم وكان نفسي أعمله من زمان من 2003".
وتابع صبحي: "لغاية ما بقى رئيس وزرا، بعتلي قالي مرشح لوزير الثقافة، قلتله لأ، قالي ليه؟، قلتله مش عايز مش حابب عندي شغلي".
واستكمل: "تاني مرة الوزارة اللي بعدها، قالي أنا عايز أعرف بقى إيه السبب؟، طيب اقبل 3 أشهر وأنا هخليك تعتذر وتمشي، قلتله لا، الـ3 أشهر دول لحرق البني آدم، هاته واحرقه وخلص عليه، أنا مش بتاع ده".
محمد صبحي: "قلت لـ إبراهيم محلب كيف أحرم نفسي من صناعة الثقافة لكي أديرها؟"
وأردف “صبحي”: "قالي طيب أنا عايز أعرف إيه السبب لرفضك؟، قلتله لأني أرى أن وزير الثقافة هو الذي يدير الثقافة ويصنع مخطط للثقافة في الوطن، الفنان هو صانع الثقافة، فكيف أحرم نفسي من صناعة الثقافة لكي أديرها وأنا أعلم لن تدوم في إدارتها".
وأردف: "نمرة 2 أنت عندك استعداد إني أمشي 80% من اللي في الوزارة؟، قالي إزاي؟، قلتله همشيهم وهياخدوا مرتباتهم وهما في البيت، تقدر تعمل ده؟، قالي لأ طبعًا".
واختتم قائلاً: "قلتله عشان كده أنا ماحبش المنصب، أنا متأكد، وده اللي يحزن وأنا بقولها لصديق ليا كان لـ إبراهيم محلب، قلتله أنا حزين إن فيه اللي واخد 3 دكتوراة وماجستير ودارسين على أعلى مستوى من الفكر، فين هما عشان نجم معروف ييجي يمسك وزارة الثقافة؟".
